माओवादीले काठमाडौंमा गर्ने जनप्रदर्शनमा भीड बढाउन बाहिर जिल्लाबाट बोलायो कार्यकर्ता

१० कात्तिक, काठमाडौं । नेकपा माओवादीले आज काठमाडौंमा जनप्रदर्शन र खबरदारी सभा गर्ने भएको छ । सरकारका गलत कमदको बिरोध र गर्नुपर्ने काम लागि ध्यानाकर्षण गराउन काठमाडौंको प्रदर्शनीमार्गमा आज खबरदारी सभा गर्ने निर्णय गरेको माओवादी केन्द्रले जनाएको छ ।

माओवादी केन्द्रले विपत् व्यवस्थापनमा देखिएको सरकारको असंवेदनशीलता, गैरजिम्मेवारीपन र योजनाविहिनताका कारण बेपत्ताहरुको खोजी, राहत वितरण, घाइतेहरुको उपचार, अस्थायी आवास निर्माण लगायत पुनर्निर्माण र पुनर्स्थापनाको क्षेत्रमा देखिएका समस्या समाधान गर्न, आफ्नो पार्टी नेतृत्वको सरकारले सुरु गरेको सुशासनको अभियानलाई कमजोर बनाउन भइरहेका षड्यन्त्र र भ्रष्टाचारजन्य गतिबिधिलाई निष्तेज पार्न खबरदारीसभा गर्ने जनाएको छ ।

काठमाडौंमा गरिने सभामा उपस्थित हुन बागमती प्रदेशका सबै जिल्लाबाट कार्यकर्ता पठाउन उर्दी गरिएको माओवादीले जनाएको छ । पछिल्लो समयमा पार्टीप्रति जनताको आस्था घट्दै गएपछि यस्ता सभासमारोहमा कार्यकर्ताहरुको उपस्थिति कम हुन थालेको छ ।