प्रचण्ड लक्षित ओलीको चेतावनीः हतियार चलाउन जानेको छु भनेर धेरै नउफ्रिनु, धम्कीले खाने दिन गए

११ कात्तिक, काठमाडौं । प्रधानमन्त्री केपी शर्मा ओलीले नेकपा माओवादीका अध्यक्ष पुष्पकमल दाहाल प्रचण्डलाई हतियार चलाउने धम्की नदिन चेतावनी दिएका छन् । उनले हतियार चलाउनेलाई कसरी बिसाउन लगाउनुपर्छ भन्ने कुरा आफूले जानेको बताएका छन् । उनले हतियार चलाउनेलाई ठेगान लगाएर नै यहाँसम्म आएको दावी गरेका छन् ।  

शनिबार नेकपा माओवादी केन्द्रका अध्यक्ष प्रचण्डले पार्टीको विरोध सभालाई सम्बोधन गर्दै ‘हामीले हतियार मात्रै बिसाएका हौँ, चलाउन बिर्सेका छैनौं’ भन्दै विद्रोह लक्षित अभिव्यक्ति दिएका थिए । यसको ओलीले जवाफ फर्काउँदै यस्तो धम्की नदिन चेतावनी दिएका हुन् । 

एनआरएनए स्थापना दिवसका अवसरमा आयोजित कार्यक्रमलाई सम्बोधन गर्दै प्रधानमन्त्री ओलीले धम्कीका भरमा खाने दिन सकिएको बताए । हिजो एक जना उफ्रि उफ्रि भाषण गर्दै थिए । हिजो मात्रै देख्या थे । हतियार बिसाएको मात्रै हो भ्रम नरहोस् । चलाउन बिर्ष्या छैन भन्दै थिए । त्यस्तै त्यस्तै त हामी हुनु भएन नी धम्क्याएका भरमा खाने जमाना गए ।’

उनले आफूलाई हतियार चलाउन नआएपनि कसरी बिसाउनु लाउनुपर्छ भन्ने तरिका आफूलाई थाहा भएको बताए । उनले भने, ‘म त्यसलाई फेरि हतियार कसरी बिसाउन लाउनुपर्छ भन्ने तरिका पनि हामीलाई थाहा छ पनि नभनौँ । हामी चलाउन त चलाउँदैनौँ तर बिसाउन चाँही लगाउन जानेको छ हामीले ।’