वालिङको शिक्षा क्षेत्र निरन्तर विवादित, विचौलिया हावी हुँदा जनप्रतिनिधि विवादमा

११ कात्तिक, स्याङ्जा । स्थानीय तहका जनप्रतिनिधिले जनअपेक्षा अनुसार काम गर्न नसकेको गुनासो चुलिँदै जाँदा स्याङजाको वालिङ नगरपालिका एक पछि अर्को विवादमा तानिएको छ । शिक्षा ऐन संशोधनको विषय सर्वोच्च अदालतसम्म पुगेको विषय सेलाउन नपाउँदै गैरकानुनी हिसाबले शिक्षक सरुवाको घटनाले वालिङ नगरपालिका पुनः विवादित बन्न पुगेको हो ।   

जनताको घरदैलोको सरकारको रुपमा रहेका स्थानीय तहमा जनप्रतिनिधिको मनपरी र कर्मचारीको लापरबाहीले चरम बेथिति निम्त्याएको मात्र छैन, संघीयतामै वितृष्णा जगाउने काम भएको छ ।

शिक्षक सरुवा गैह्रकानुनी
घटना २०८१ असोज १३ गतेको हो । वालिङ नगरपालिका ५ स्थित श्री महेन्द्र माध्यमिक विद्यालयका माध्यमिक तहका स्थायी शिक्षक अर्जुन पोख्रेल र रणवीर जनहित माध्यमिक विद्यालयका माध्यमिक तहका स्थायी शिक्षक कमल लम्सालको सरुवा गैह्रकानुनी भन्दै विवादित बनेको छ ।

वालिङ नगरपालिकाको शिक्षा शाखा प्रमुख र रणवीर जनहित माध्यमिक विद्यालयका प्रधानाध्यापक लक्ष्मीप्रसाद रेग्मीको मिलेमतोमा गरिएको सरुवा विवाद अहिले वालिङमा मात्र नभइ शिक्षा तथा मानव स्रोत विकास केन्द्र शिक्षक व्यवस्थापन विभागसम्म पुगेको छ । 

नेपाली कांग्रेसका महाधिवेशन प्रतिनिधि समेत रहेका रणवीरका प्रअ लक्ष्मीप्रसाद रेग्मी वालिङ नगर शिक्षा समितिका सदस्य समेत हुन् । आफू अनुकूलको शिक्षक सरुवा गरी आफू कार्यरत विद्यालयमा ल्याउन ग्राण्ड डिजाइन गरेका रेग्मीले शिक्षा शाखा प्रमुख काफ्लेलाई प्रभावमा पारेपछि काफ्लेले समितिका बहुमत सदस्यलाई हस्ताक्षर गराएका थिए । समितिको बैठक नबसी हस्ताक्षर गर्न लगाएको शिक्षा समितिका एक सदस्यले स्वीकार गर्दै, आफूहरूलाई पूर्णरुपमा प्रकृया मिलेको भन्दै हस्ताक्षर गर्न बाध्य पारिएको बताएका छन् । दुवै विद्यालयको सहमतिमा सरुवा भएको भनेर हामीलाई फसाइयो, उनले टेलिफोन सम्वादमा भने । 

स्थानीय सरकार सन्चालन ऐन २०७४ ले स्थानीय तहलाई शिक्षक सरुवाको अधिकार दिएको छैन । वालिङमा गरिएको यो सरुवा शिक्षक सरुवा निर्देशिका २०८१ अनुसार गरिएको भनिएपनि निर्देशिकामा उल्लेख गरिएका कुनै प्रकृया अवलम्वन गरिएको छैन । निर्देशिकमा दरबन्दी मिलान गर्न सक्ने अधिकार स्थानीय सरकारलाई दिएको छ । दरबन्दी मिलान शैक्षिक सत्र सुरु हुनुभन्दा अगावै वा सुरु हुनासाथ पालिकाभर एक साथ गर्नुपर्ने उल्लेख गरेको छ । व्यक्ति मिलान सरुवालाई दरबन्दी मिलानको अपव्याख्या गरेर सरुवा गरेपछि गैह्रकानुनी सरुवाको आरोप लगाइएको हो ।

उक्त सरुवामा रणवीरको व्यवस्थापन समितिको सहमति नगरी सरुवा गरिएको थियो भने महेन्द्र माविमा चाडवाडमा प्रअ रिक्त हुँदा तलब खुवाउन नसकिएको विशेष परिस्थिति भन्दै सरुवा गरिएको शिक्षा शाखाले जनाएको छ ।

कानुन विपरितको सरुवामा व्यवस्थापन समितिको अंकुश
रणवीर जनहित मा.वि.का शिक्षक लम्साललाई महेन्द्र मा.वि.मा सरुवा गरेपछि उनको ठाउँमा ल्याइएका रेग्मी अनुकुलका पोख्रेललाई हाजिर नगराउन रणवीरका ६ जना व्यवस्थापन समितिका सदस्यहरूले नगरपालिकामा उजुरी दर्ता गरेका छन् । 

शिक्षक सरुवा सम्बन्धी निर्देशिका २०८१ मा गलत कागजात पेश गरी वा सरुवा प्रति गुनासो आएमा सम्बन्धित अधिकारी समक्ष सरुवा बदर गर्न निवेदन दिन सकिने र ७ दिन भित्र निवेदन उपर कारवाही गर्ने प्रावधान समेत उल्लेख गरेको छ ।

नगरपालिकामा विचौलिया हावी 
स्थानीय सरकार संचालनमा कानुन विपरीत काम गर्न गराउन विचौलिया सधैं हावी भएका छन् । वालिङ नगरपालिकाको पछिल्लो विवादित सरुवामा पनि शिक्षक संघ र संगठनका नाममा समितिमा पुगेकाले ऐन र कानुनको गलत व्याख्या गरेका कारण सरुवा विवादित बन्न पुगेको स्पष्ट देखिन्छ ।

नगरपालिका भित्र शिक्षक नियुक्ति र सरुवामा यिनै संघ र संगठन सधैं विचौलियाका रुपमा हावी हुने गर्द शैक्षिक क्षेत्र सधैं विवादमा आइरहेको छ । वालिङ नगरपालिकाका नगर प्रमुख कृष्ण खाँण यो विवादित सरुवा वदर गर्न तयार हुँदा शिक्षा शाखा प्रमुख र तिनै शिक्षक संघ र संगठनबाट अवरोध आएको कार्यालय स्रोतको दावी छ ।

शिक्षकलाई राजनीतिक दलको सदस्यता लिन समेत कानुनी बन्देज रहेको अवस्थामा वालिङमा भने नेपाली कांग्रेसका महाधिवेशन प्रतिनिधि र नेकपा एमालेका जिल्ला सचिवालय सदस्य नगर शिक्षा समितिमा रहनुले शिक्षा क्षेत्र राजनीतिक चंगुलबाट उठ्न नसकेको नगरवासीको आरोप रहेको छ ।