तस्करी गर्न नपाएपछि कर्मचारी बिदा छोड्दै डीएसपी कटुवाल

११ कात्तिक, काठमाडौं । सशस्त्र प्रहरीमा सुशासनको दर बढ्न थालेपछि केही प्रहरी अधिकृतहरूमा छटपटी शुरु भएको छ । तस्करी धन्दा चलाएर भक्तपुरमा आलिसान बंगला बनाएको आरोप लागेका सशस्त्र प्रहरीका डीएसपी शम्भु कटुवालमा यस्तो छटपटी शुरु भएको हो ।

उनी अहिले चितवनको छरछरे बीओपीको इन्चार्ज रहेका छन् । “उनी अहिलेसम्म न कतै मिसन गएका छन्, न तलबले त्यत्रो घर बन्छ, उनी करिब १० बर्ष मधेस प्रदेश बसेर तस्करी गराउन तल्लीन थिए । जस कारण घर र अरु २/३ वटा घडेरी किन्न सफल पनि भए ।” सशस्त्र प्रहरी स्रोतले भन्यो ।

अहिले चितवनको छरछरे बीओपी पुगेका उनी त्यहाँ तस्करी गराउन नपाएपछि मातहत कर्मचारी बिदा छोडेर राशनबाट कमाउन लागेको समाचार स्रोतको भनाई छ । स्रोतका अनुसार महंगा होटेलमा पुगेर बिदा मनाउने उनलाई पैसाको जरुरत पर्यो अनि ३० जना रहेको बीओपीमा २० जना त बिदामा नै हुन्छन् । कमान्डर हुँदा कहिल्यै सुधारको काम नगर्ने तर कामाउ धन्दा मात्र गर्ने उनको बानी रहेको बताइन्छ ।

‘चितवनको छरछरे नाका होइन, त्यसैले उनको ध्यान बिदा छोडेर राशनमा गएको छ’, स्रोतले भन्यो । उनको महँगो दैनिकी देखेर मातहत कर्मचारी समेत अचम्म पर्ने गरेका छन् । उनी मात्र होइन राशनको पैसाले उनको घर परिवारलाई पनि खर्च पुर्याउनु पर्ने उनीसँग तराईमा सँगै बसेका एक जुनियर अधिकृतले बताए । कर्मचारीलाई बिदामा पठाएकै कारण चितवनमा रहेको गणले थप मद्दत माग्दा दिन सकेको छैन । उनको विषयमा अहिले मुख्यालयमा उजुरी परेको र उजुरीपछि मुख्यालयले उनको निगरानी बढाएको बताइएको छ ।