प्रधानमन्त्री ओलीलाई भारतले किन दिएन महत्व ?

११ कात्तिक, काठमाडौं । संयुक्त राष्ट्रसंघको महासभामा भाग लिन अमेरिका पुगेका प्रधानमन्त्री केपी शर्मा ओली र उनका भारतीय समकक्षी नरेन्द्र मोदीबीच भेटवार्ता भएपछि भारतले ओलीलाई भारत भ्रमणमा बोलाउने अपेक्षा गरिएको थियो । तर, प्रधानमन्त्री ओलीले यतिबेला भारत छाडेर चीन भ्रमणको तयारी थालेका छन् । कात्तिक अन्तिम साता या मंसिर पहिलो साता बेइजिङ भ्रमण गर्ने उनको तयारी छ । 

ओली चीन भ्रमणमा जाने खबर बाहिरएपछि भारतले यसपटक पनि उनलाई महत्व नदिएको चर्चा हुन थालेको छ । प्रधानमन्त्रीको सचिवालयका अनुसार परराष्ट्र मन्त्रालय र विकास योजनासँग सम्बन्धित मन्त्री तथा सचिव डाकेर चीनसँगका सम्झौताको प्रगतिबारे फलोअप गर्न ओलीले निर्देशन दिइसकेका छन् । यसअघि भारत भ्रमण गरेकी परराष्ट्रमन्त्री आरजु राणाले भारतीय प्रधानमन्त्री नरेन्द्र मोदीलाई नेपालको राजकीय भ्रमणको निम्तो हस्तान्तरण गरेकी थिइन् । यसपछि ओलीको भारत भ्रमण सहज हुने अपेक्षा गरिएको थियो ।  

नेपालमा कुनै पनि व्यक्ति प्रधानमन्त्री भए लगत्तै पहिलाे बधाई दिने र भारत भ्रमणको निम्तो दिने भारतीय परम्परा भएपनि यसपटक प्रधानमन्त्रीमा नियुक्त भएका केपी ओली प्रधानमन्त्री भएको यतिका दिन बितिसक्दा पनि भ्रमणको चाँजोपाँजो मिलेन । प्रधानमन्त्री भइसकेपछि भारत भ्रमण गर्नुलाई ठूलै प्रतिष्ठाको विषय बनाउने चलन नेपालको छ । भारतले पनि यसरी नै महत्व दिएर बोलाउने गरेको थियो । यसअघि पनि नेपालका पूर्वप्रधानमन्त्री सुशील कोइरालालाई भारतले भ्रमणको औपचारिक निम्तो आएको थिएन । ओलीलाई पनि यसअघि मुश्किलले निम्ता आएको थियो । 

नयाँदिल्लीस्थित हैदरावाद हाउसमा मोदीसँग शिष्टाचार भेटपछि परराष्ट्रमन्त्री राणाले सामाजिक सञ्जाल एक्समा भारतका प्रधानमन्त्री नरेन्द्र मोदीसँग नयाँ दिल्लीमा शिष्टाचार भेटवार्ता भएको र चाँडै भ्रमण र उच्चस्तरीय भेटघाट हुने बताएकी थिइन् । तर, त्यसले कुनै नतिजा निकाल्न नसकेपछि प्रधानमन्त्री ओली चीनतिर लागेका छन् । बेइजिङ भ्रमणको तयारीका क्रममा प्रधानमन्त्री ओलीले बीआरआईलगायत अन्य चिनियाँ सम्झौताको प्रगतिबारे चासो राखेका छन् ।

नेपालमा नयाँ प्रधानमन्त्री बनेसँगै पहिले दक्षिणी छिमेकी भारतको भ्रमण गर्ने सामान्य प्रचलनजस्तै बनिसके पनि चौथोपल्ट प्रधानमन्त्री भएका ओली राष्ट्रसंघ महासभामा भाग लिने क्रममा अमेरिका पुगेका थिए । त्यहाँ भारतीय प्रधानमन्त्री नरेन्द्र मोदीसँग साइडलाइन भेट गरे पनि उनीहरूबीच सौहार्दता विकास हुन नसकेको देखिन्छ । यसै क्रममा ओलीले चीन भ्रमण गर्न लागेका हुन् । चीनसँगको आर्थिक विकास फ्रेमवर्क बीआरआई, ऊर्जा तथा व्यापार लगायत विषयमा छलफल हुन सक्ने बताइएको छ । भारत भ्रमणमा जाने तत्काल सम्भावना नभएकै कारण ओली चीनको भ्रमणतिर लागेको हुन् ।