बम राखेको हल्ला चलेपछि दिल्ली फर्किन लागेको एयर इन्डियाको जहाजलाई सुरक्षा निकायले रोक्यो

१२ कात्तिक, काठमाडौं । त्रिभुवन विमानस्थलमा अवतरण भई दिल्ली फर्किन लागेको भारतीय वायुसेवा एयर इण्डियाको जहाजमा अज्ञात समूहले बम राखेको सूचना दिएपछि उक्त जहाज रोकिएको छ ।  काठमाडौंबाट दिल्ली फर्किने तयारीमा रहेको जहाजलाई यात्रु ओरालेर नेपालको सुरक्षा निकायले जाँच सुरु गरेको हाे । 

विमानस्थलस्थित कर्मचारी स्रोतका अनुसार आज दिउँसो साढे २ बजे काठमाडौंमा अवतरण भएको जहाजमा बम रहेको हल्लापछि नेपाल प्रहरी, नेपाली सेनाले सुरक्षा जाँचका लागि जहाजलाई नियन्त्रणमा लिएको छ । दिल्लीमा रहेको एयर इन्डियाको कार्यालयबाट काठमाडौं विमानस्थललाई बम रहेको खबर आएको हो । कुनै समूहले काठमाडौंमा अवतरण भएको जहाजमा बम रहेको खबर गरेपछि त्यो यता पनि फैलिएको हो । 

अहिले विमानस्थल सुरक्षा निकायले उक्त विमानलाई प्रोटोकल अनुसार जाँच गरिरहेको छ । एयर इन्डियाको नेपालस्थित कार्यालयले भने कुनै सूचना दिएको छैन । गत साता दिल्लीबाट काठमाडौं आएको भारतीय विमान भिस्तारामा पनि बम राखिएको हल्ला चलेको थियो । तर जाँचपछि बम भेटिएको थिएन । आज पनि उस्तै हुने आशंका गरिएको छ ।