प्रहरीमा बढुवा सकसः आठ डीआईजीका लागि दर्जन प्रतिस्पर्धी

१३ कात्तिक, काठमाडौं । नेपाल प्रहरीको प्रहरी नायब महानिरीक्षक (डीआईजी) मा रिक्त दरबन्दी संख्या ८ पुगेपछि मात्रै बढुवा निकाल्ने तयारी भएको छ । हाल ५ दरबन्दी रिक्त रहेकामा १७ कात्तिकसम्म थप ३ दरबन्दी रिक्त भएपछि मात्रै बढुवा गर्न लागिएको हो । दुई दिन अघि गृहमन्त्री रमेश लेखकलाई आईजीपी बसन्त कुँवरले भेटेर बढुवाको तयारी भैरहेको जानकारी गराएका थिए । आईजीपीले असोज १७ सम्ममा डीआईजीको ८ पद खाली हुने जानकारी दिएर त्यसपछि मात्रै बढुवाको तयारी गर्ने जनाएका थिए ।

प्रहरीको केन्द्रीय अनुसन्धान ब्यूरो (सीआईबी)मा दरबन्दी भई त्रिभुवन अन्तर्राष्ट्रिय विमानस्थल सुरक्षा कार्यालयमा कार्यरत डीआईजी किरण राणा प्रहरी अतिरिक्त महानिरीक्षक (एआईजी) मा बढुवा सिफारिस भएपछि एउटा डीआईजी पद रिक्त भएको छ ।  त्यसअघि नै डीआईजी यज्ञविनोद पोखरेल १४ असोजमा ५६ वर्षे उमेर हदका कारण अनिवार्य अवकाशमा गएका थिए । १६ भदौमा बागमती प्रदेशका डीआईजी बिष्णुकुमार केसी पनि ५६ वर्षे उमेरहदकै कारण अनिवार्य अवकाशमा गएका थिए । रामदत्त जोशी एआईजीमा बढुवा भएपछि डीआईजीको एउटा दरबन्दी खाली नै छ । २१ असारमा डीआईजीबाटै पोषराज पोखरेल अवकाशमा गएका थिए । उनको ठाउँमा पनि डीआईजीको दरबन्दी खाली रहेको छ । हिजो आइतबार अर्थात ११ कात्तिकमा प्रहरी शिक्षालय भरतपुरका निर्देशक डीआईजी राजेशनाथ बाँस्तोला पनि अवकाशमा गएका छन् ।

अहिले एआईजी बढुवा सिफारिस भएकी राणा १५ कात्तिकमा ५६ वर्षे उमेरहदका कारण अनिवार्य अवकाशमा जानेछिन् । त्यसको २ दिनपछि १७ कात्तिकमा अर्का एआईजी रामदत्त जोशी पनि उमेरहदकै कारण अवकाशमा जाँदैछन् । राणालाई अवकाशको मुखमा एआईजी उपहार दिइएको थियो । यी २ एआईजीहरु अवकाशमा गएसँगै उनीहरुको ठाउँमा २ जना डीआईजी  एआईजीमा बढुवा हुनेछन् । कात्तिक १७ पछि रिक्त हुने दुई एआईजीका लागि एक दर्जन डीआईजीहरु प्रतिस्पर्धामा छन् । 

हालै ६ वैशाख २०८० मा बढुवा भएका डीआईजीहरू पनि एआईजीको प्रतिस्पर्धामा छन् । ६ वैशाखमा बढुवा भएकाहरूबाट लुम्बिनी प्रदेश प्रहरी प्रमुख रहेका कुवेर कडायत, प्रबन्ध शाखामा रहेका केदार ढकाल, भरतबहादुर बोहरा, रवीन्द्र केसी, चन्द्रकुवेर खापुङ, जनक भट्टराई, लालमणि आचार्यलगायत एआईजी बढुवाको प्रतिस्पर्धामा छन् । तर ढकाल र बोहोरा पनि चाँडै नै अवकाशमा जानेछन् । उनीहरू मध्येबाट २ जना एआईजीमा बढुवा भएपछि १७ कात्तिकपछि नेपाल प्रहरीमा ८ डीआईजीको दरबन्दी रिक्त हुनेछ । १७ कात्तिकपछि रिक्त हुने ८ डीआईजीका लागि तीन ब्याचका प्रहरी वरिष्ठ उपरीक्षक (एसएसपी) हरुबीच प्रतिस्पर्धा हुने भएको छ ।

जसमा हालका प्रहरी महानिरीक्षक वसन्तबहादुर कुँवरका ब्याचीहरु तीन जना डीआईजी बढुवाको प्रतिस्पर्धामा छन् । २०५१ चैत ५ मा प्रहरी निरीक्षक (इन्सपेक्टर)मा भर्ना भएकाहरू ध्रुवराज राउत, भोलाबहादुर रावल र गणेश चन्द डीआईजी बढुवाको प्रतिस्पर्धामा छन् । उनीहरू डीआईजीमा बढुवा भए पनि अहिलेकै व्यवस्था अनुसार आउँदो ५ चैतमा ३० वर्षे सेवा अवधिका कारण अनिवार्य अवकाशमा जानेछन् । यद्यपि यसै वर्षबाट ३० वर्षे सेवा हटाउने गरी नयाँ प्रहरी ऐन ल्याउने तयारी भइरहेको छ ।

यो बाहेक २०५३ सालमा राष्ट्रिय अनुसन्धान विभागको प्रहरी निरीक्षकमा भर्ना भएर प्रहरीमा स्थानान्तरण भएको ब्याच र २०५४ मा नेपाल प्रहरीकै इन्स्पेक्टरमा भर्ना भएको ब्याचका अधिकृतहरू डीआईजी बढुवाको प्रतिस्पर्धामा छन् । २०५३ को टोलीबाट सिद्धिविक्रम शाह, सुशील सिंह राठौर, उमाप्रसाद चर्तुवेदी, हिमालयकुमार श्रेष्ठ, डम्बरबहादुर बिक, ओमबहादुर राना डीआईजी बढुवाको प्रतिस्पर्धामा छन् । २०५४ को ब्याचबाट ईश्वर कार्की, राजेन्द्रप्रसाद भट्ट, दिनेशकुमार आचार्य, अरुण पौडेल र गोविन्द थपलिया डीआईजीको प्रतिस्पर्धामा छन् । आफू भन्दा दुई ब्याचका अधिकृतहरुलाई पछि पार्दै रवि लामिछाने गृहमन्त्री रहेका बेला २०५४ को ब्याचका दानबहादुर कार्की, डा. मनोज केसी र राजन अधिकारी ४ जेठ २०८१ बढुवा भइसकेका छन् । उनीहरुले छलाङ मारेकोमा निकै विवाद भएको थियो ।

त्यसैगरी माधवप्रसाद श्रेष्ठ, दीपेन्द्र घर्ती क्षेत्री, दीपक रेग्मी, दिलिपसिंह देउवा, विनोद घिमिरे, सुदर्शनप्रसाद कोइराला, दीपककुमार बस्नेत, जयराम सापकोटा, सुरेन्द्रबहादुर गुरुङ, सञ्जय शर्मा दास, शारदाप्रसाद चौधरी पनि डीआईजी बढुवाको प्रतिस्पर्धामा छन् ।