गुणस्तरीय सुन अभावले यो वर्ष धनतेरसलाई राष्ट्र बैंकले दिन सकेन माग अनुसारको असर्फी

१३ कात्तिक, काठमाडौं । नेपाल राष्ट्र बैंकले आज सुनको असर्फी बिक्री खुला गरेको छ । असर्फी लिन बिहानैदेखि टक्सार महाशाखामा भीड लागेको छ । टक्सार महाशाखाका अनुसार २.५ ग्राम तौलको सिक्का बिक्री गरिरहेको हो । असर्फी आज दिउँसो ४ बजेसम्म लिन पाइनेछ । राष्ट्र बैंकका अनुसार एक व्यक्तिले एउटामात्रै सुनको असर्फी पाउनेछ ।

राष्ट्र बैंकले चाँदीको सिक्का भने आइतबारदेखि नै बिक्री खुला गरेको थियो । टक्सार महाशाखाले १० र २५ ग्रामको लक्ष्मी, गणेश, गजलक्ष्मी र गाई अंकित चाँदीको सिक्री बिक्री गरिरहेको छ । दशैंमा नयाँ नोटको साटो सुकिला वितरण गरेको राष्ट्र बैंकले यसपालीको धनतेरसमा पनि पर्याप्त संख्यामा सुनका सिक्का (असर्फी) बिक्री गरेन । असर्फी बनाउन आवश्यक उच्च गुणस्तरको सुन अभाव भएकाले ठूलो संख्यामा असर्फी बनाउन नसकिएको राष्ट्र बैंकले जनाएको छ । 

असर्फी कम भएकाले यस वर्षको धनतेरसलाई आज एक दिन मात्र असर्फी बिक्री गरिने सूचना यसअघि नै जारी गरिसकेको थियो । यद्यपि आफूसँग स्टकमा रहेको असर्फी बिक्रीका लागि एक दिनलाई मिति तोकिएको राष्ट्र बैंकले जनाएको छ । सुनको असर्फी २.५ ग्राम प्रतिव्यक्ति एक थानका दरले जो पहिले आउँछ, उसैले पाउने गरी मंगलबार एक दिन मात्र मौज्दात कायम रहे मध्याह्न ४ बजेसम्म बिक्री गरिनेछ,’ राष्ट्र बैंकको सूचनामा भनिएको छ ।

यसअनुसार ‘९९९.९९ टच’ भनेको सबैभन्दा उच्च गुणस्तरको (शुद्ध) सुन हो । नेपाल राष्ट्र बैंकको टक्सार विभागले सुनचाँदीका सिक्का पनि सर्वसाधारणलाई वितरण गर्दै आएको छ ।  एक वर्षमा राष्ट्र बैंकबाट बिक्री हुने सुन र चाँदीका सिक्कामध्ये ९० प्रतिशतभन्दा बढी तिहारका बेला बिक्री हुने राष्ट्र बैंकले जनाएको छ ।

गुणस्तरीय सुन नभएकाले यस वर्ष मागअनुसार असर्फी वितरण गर्न नसकिएको नेपाल राष्ट्र बैंक टक्सार विभागले जनाएको छ ।  सुनका सिक्का लिन नपाउने नागरिकलाई चाँदीको सिक्का खरिद गर्न पनि राष्ट्र बैंकले आग्रह गरेको छ ।  सामान्यतया बजारमा २२ क्यारेट र २४ क्यारेट भनेर सुनको गुणस्तर वर्गीकरण गर्ने गरिन्छ । तर राष्ट्र बैंकले नम्बरका आधारमा सुनको गुणस्तर हेर्ने गर्छ ।