लामिछाने छुटाउन भित्रभित्रै हारगुहारः गृहमन्त्री लेखकसँग डीपीको भेटघाट

१३ कात्तिक, काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेलाई छुटाउन भित्र भित्रै हारगुहार थालिएको छ । नेपाल प्रहरीले सम्पत्ति शुद्धीकरण, संगठित अपराध तथा सहकारी ठगीमा अनुसन्धानका लागि दोस्रोपटक म्याद लिएपछि रास्वपाले सरकारी अधिकारीहरूसँग हारगुहार गर्न थालेका छन् । सोमबार साँझ मात्रै रास्वपाका उपसभापति डोलप्रसाद अर्यालले गृहमन्त्री रमेश लेखकसँग भेटवार्ता गरेर लामिछानेलाई हिरासत बाहिर राखेर अनुसन्धान गर्ने वातावरणमा सहजीकरण गरिदिन आग्रह गरेका छन् ।

उपसभापति अर्यालले सिंहदरबारस्थित गृह मन्त्रालय पुगेर गृहमन्त्री लेखकसँग भेटवार्ता गरेका हुन् । रास्वपा सभापति रवि लामिछाने सहकारी ठगी र संगठित अपराध कसुरमा कास्की प्रहरी हिरासतमा छन् । गत कात्तिक २ गते लामिछानेलाई रास्वपा केन्द्रीय कार्यालय बालाजु चःमतिबाट पक्राउ गरेर पोखरा लगिएको थियो । सभापति लामिछानेलाई राजनीतिक प्रतिशोधका आधारमा पक्राउ गरेको भन्दै रास्वपाले सडकमा प्रदर्शन गरिराखेको छ । रास्वपाले आन्दोलनको कमाण्डर अर्याल र राजनीतिक रुपमा वार्ता गर्ने जिम्मा स्वर्णिम वाग्लेलाई दिएको छ ।

पछिल्लो पटक वीरगन्जको सानो पाइला बचत तथा ऋण सहकारी संस्थाबाट पनि गोर्खा मिडिया नेटवर्क प्रालिमा साढे ८ करोड रुपैयाँ लगेर अपचलन गरेको पाइएको थियो । सानो पाइलाबाट गैरकानुनी रूपमा रकम सार्दा गोर्खा मिडियामा रवि लामिछाने प्रबन्ध निर्देशक थिए ।  

सहकारीको बचत दुरुपयोगसम्बन्धी संसदीय छानबिन विशेष समितिको प्रतिवेदनअनुसार ग्लोबल आईएमई बैंकमा रहेको गोर्खा मिडियाको खातामा सानो पाइलाबाट सात पटक गरी आठ करोड ५८ लाख ४४ हजार रुपैयाँ जम्मा गरिएको थियो । ०७८ साउन १९ मा एकै दिन चार करोड ९१ लाख ९४ हजार रुपैयाँ सारिएको थियो । अरू रकम ०७८ वैशाख ५ देखि ०७९ साउन १९ सम्ममा सारिएको हो । संसदीय छानबिन समितिलाई दिएको बयानअनुसार लामिछाने ०७७ माघ १ देखि ०७९ असार १ सम्म गोर्खा मिडियामा प्रबन्धक निर्देशक थिए ।

काठमाडौंको स्वर्णलक्ष्मी सहकारीबाट पनि गोर्खा मिडियामा लगानी गरिएको थियो । सोही सहकारीबाट ऋण लिएको विषयमा निकिता पौडेल लामिछाने पनि मुछिएकी छन् । निकिता रवि लामिछानेकी श्रीमती हुन् । उनी अहिले  पोखरामा रहेकी छिन् । सत्य साई सहकारीमा पनि निकिता पौडेल मुछिएकी छिन् । प्रहरीले यतिबेला पोखराको सूर्यदर्शन, बुटवलको सुप्रिम सहकारीको पैसा अपचलन बारे अनुसन्धान गरिरहेको छ ।

कास्की प्रहरीले गोरखा मिडियाका तत्कालीन प्रबन्ध निर्देशक लामिछाने र सञ्चालक एवं पूर्वडीआईजी छविलाल जोशी बञ्जाडेलाई पक्राउ गरी सहकारी ठगी र संगठित अपराधमा अनुसन्धान गरिरहेको छ । कास्कीको सूर्यदर्शन सहकारीका पीडितले दिएको जाहेरी र संसदीय विशेष छानबिन समितिको सिफारिश कार्यान्वयन गर्ने क्रममा प्रहरीले रवि र छवि दुवैलाई पक्राउ गरेको हो ।

पाँच वटा सहकारीबाट गोरखा मिडियामा लगिएको ६५ करोड ५४ लाख रुपैयाँ अपचलनमा रवि र छविमाथि प्रहरीले बयान लिइरहेको छ । रवि र छविले जीबीमाथि दोष थुपारिरहेका छन् । प्रहरीले जीबी राईविरुद्ध पनि पक्राउ पुर्जी जारी गरेको छ । त्यतिमात्रै होइन, कास्की र रूपन्देही प्रहरीको आग्रहमा प्रहरी प्रधान कार्यालयको इन्टरपोल शाखाले राईविरुद्ध गत माघ १३ मा डिफ्यूजन र फागुन २१ मा रेडकर्नर नोटिस जारी गरिसकेको छ ।