रिजालको प्रश्न, रविलाई रिहा गरिदिन राती-राती रास्वपाका नेता कुन मुख लिएर बालुवाटार छिरे ?

१३ कात्तिक, काठमाडौं । नेकपा एमालेका नेता विष्णु रिजालले रास्वपाका उपसभापति डोलप्रसाद अर्याल र प्रमुख सचेतक सन्तोष परियार रवि लामिछानेलाई छुटाउन बालुवाटार पुगेर प्रधानमन्त्रीलाई अनुरोध गरेको दावी गरेका छन् ।

सामाजिक सञ्जालमा नेता रिजालले दिनभरी प्रधानमन्त्री विरुद्ध गालीगलौज गर्ने र राति रविजीलाई बचाइदिनु पर्यो भनेर हारगुहार गरेको बताएका छन् । सहकारी ठगीको अनुसन्धानमा रहेका रविलाई रिहाइको माग लिएर उनीहरू बालुवाटार छिरेको दावी उनको छ । 

दिनभरि प्रधानमन्त्रीका विरुद्धमा व्यक्तिगत रूपमा गालीगलौज गर्ने, शब बनाएर दाहसंस्कार गर्ने जस्तो अशोभनीय काम गर्ने, नामै लिएर लाञ्छना लगाउने रास्वपाका साथीहरू राती–राती कुन मुख लिएर बालुवाटारमा कुरेर ‘रविजीलाई बचाइदिनु पर्यो, लौ न’ भनेर हारगुहार गर्दा हुन् ?

यति हेक्का राखे हुन्छ– राजनीतिमा धैर्य र इमान चाहिन्छ । जे गर्छ, कानुनले गर्छ । डोलप्रसादजी र सन्तोषजीले सम्माननीय प्रधानमन्त्रीज्यूलाई अनुरोध गरे जस्तो उहाँले चाहँदैमा मुद्दा फिर्ता सम्भव हुन्न ।