प्रधानमन्त्रीले मंसिर १७ देखि २० सम्म चीनको भ्रमण गर्ने

१३ कात्तिक, काठमाडौं । प्रधानमन्त्री केपी शर्मा ओली आगामी मंसिर १७ देखि २० गतेसम्म चीन भ्रमणमा जाने भएका छन् । आज बस्ने मन्त्रिपरिषदको बैंकले प्रधानमन्त्रीको चीन भ्रमण स्वीकृत गर्ने बताइएको छ । साँझ ५ बजे मन्त्रिपरिषदको बैठक बोलाइएको छ । 

एमाले उच्च स्रोतका अनुसार चिनियाँ राष्ट्रपति सी जिङपिङको औपचारिक निमन्त्रणामा प्रधानमन्त्री ओली आगामी मंसिर १७ गते सोमबार चीनको राजधानी बेइजिङ जाने भएका हुन् । स्रोतले भन्यो, ‘मंसिर १७ देखि २० सम्म प्रधानमन्त्री ओलीको चीन भ्रमण तय भएको छ । पछिल्लो पटक संयुक्त राष्ट्रसंघको महासभामा भाग लिन अमेरिकाको न्युयोर्क गएका बेला प्रधानमन्त्री  ओली र चिनियाँ विदेश मन्त्री वाङ यीबीच भेट भएको थियो । सोही बेला भ्रमणको तय भएको हो ।’ 

चिनियाँ विदेश मन्त्री यी राष्ट्र संघको महासभाबाट बेइजिङ फर्किएपछि राष्ट्रपति सीसँग ओलीको भ्रमणबारे छलफल गरेका थिए । त्यस लगत्तै बेइजिङस्थित चिनियाँ विदेश मन्त्रालयले नेपालस्थित चिनियाँ दूतावासलाई प्रधानमन्त्री ओलीको भ्रमणबारे औपचारिक पत्र पठाएको थियो । दशैं अगावै नेपालका लागि चिनियाँ राजदूत छन सोङले प्रधानमन्त्री ओलीलाई चीन भ्रमणबारे राष्ट्रपति सीले पठाएको निमन्त्रणा पत्र दिएका थिए ।