बेल्जियमको राजदूतमा सेवा लम्सालको नाम संसदीय समितिबाट अनुमोदन

१४ कात्तिक, काठमाडौं । बेल्जियमका लागि नेपाली राजदूतमा सिफारिस भएकी परराष्ट्र सचिव सेवा लम्सालको नाम अनुमोदन भएको छ । बुधबार बसेको संसदीय सुनुवाइ समितिको बैठकले लम्साललाई राजदूत बनाउने प्रस्ताव अनुमोदन गरेको हो । अब उनी राष्ट्रपतिबाट राजदूतमा नियुक्त हुने छिन् । 

समितिको बैठकमा लम्सालले आफ्नो कार्ययोजना प्रस्तुत गरेकी थिइन् । कार्ययोजनामा उनले युरोपेली मुलुक र बहुपक्षीय फोरमहरुमा नेपालको राष्ट्रिय हितको संरक्षण, प्रवर्द्धनमा इमान्दारीपूर्वक काम गर्ने प्रतिबद्धता जनाएकी थिइन् । उनलाई सरकारले राजदूतका लागि नाम सिफारिस गरेको थियो । 

 यसअघि नेपालको संक्रमणकालीन न्यायको सम्बन्धमा युरोपेली मुलुकहरूमा प्रचारप्रसारको आवश्यकता रहेको र त्यसलाई आफूले प्राथमिकतामा राखेको उनले बताएकी थिइन् । नेपालको संक्रमणकालीन न्याय सफलताको कथाको प्रचारप्रसार र प्रवर्द्धन गर्नेछु, उक्त कार्यबाट नेपाललाई प्राप्त हुने लाभबारे उनको कार्ययोजनामा उल्लेख गरिएको छ, यसले नेपालको शान्ति प्रक्रिया तार्किक निष्कर्षमा पुगी अन्तर्राष्ट्रिय समुदायमा नेपालको सकारात्मक छविको प्रवर्द्धन हुनेछ, उनले भनेकी छन् ।