साफ महिला च्याम्पियनसिप फाइनलका सबै टिकट सकिए, प्रधानमन्त्री ओली पनि रंगशाला जाने

१४ कात्तिक, काठमाडौं । नेपाल र बंगलादेशबीच साफ महिला च्याम्पियनसिपको फाइनलको टिकट सबै बिक्री भएको छ । सेमिफाइनलमा दर्शकको भीड बढेकाले एन्फाले बुधबार सीमित संख्यामा मात्र टिकट बेचेको छ । दशरथ रंगशालाको दर्शक क्षमता १५ हजार भए पनि एन्फाले १० हजार २ सय हाराहारीमा मात्र टिकट बेचेको जनाएको छ । 

एन्फाले बुधबार साधारणतर्फ ५ हजार १ सय टिकट बेचेको जनाएको छ ।  त्यस्तै माउन्ट एभरेस्ट स्पोर्ट्स एन्ड इभेन्ट्स प्रालिले खल्तीबाट बेचिसकेका ४ हजार १ सय १७ टिकट पनि एन्फाले उपलब्ध गराएको छ । माउन्ट एभरेस्टसँग सम्झौता रद्द हुनुअघि नै टिकट बिक्री भएकाले उक्त संख्यामा टिकट उपलब्ध गराइएको एन्फाले जनाएको छ । 

यसअघि नेपाल र भारतबीच सेमिफाइनलमा रंगशालाको दर्शक क्षमताभन्दा बढी टिकट बिक्री भएपछि फाइनलको टिकट भने एन्फा आफैंले बेचेको हो । साधारणतर्फ ५ सय र भीआईपीतर्फ १ हजार रुपैयाँ टिकट दर तोकिएको छ । साफ वुमेन्स च्याम्पियनसिपका ७ संस्करणमध्ये योसमेत गरी नेपाल ६ पटक फाइनलमा पुगेको छ तर अहिलेसम्म उपाधि उचाल्न पाएको छैन ।

भीआईपी प्यारापिटतर्फ १ हजार मात्र टिकट बिक्री गरेको छ । नेपाल र बंगलादेशबीचको फाइनल खेल हेर्न प्रधानमन्त्री केपी शर्मा ओली पनि आउने भएकाले भीआईपीतर्फको पास पनि बढेको एन्फाले जनाएको छ । सुरक्षालाई मध्यनजर गर्दै २० प्रतिशत सिट खाली राखिएको एन्फाले जनाएको छ । टिकट पाउने आशमा दर्शकहरू बिहानैदेखि लाइनमा बसेका भएपनि लाइन बसेका सबैले टिकट पाएनन् ।