कृषिमन्त्रीको अपीलः किसानलाई हौसला दिन चाडमा स्वदेशी उत्पादनको प्रयोग गरौँ

१४ कात्तिक, काठमाडौं । कृषि तथा पशुपन्छी विकासमन्त्री रामनाथ अधिकारीले चाडका समयमा स्वदेशी उत्पादनको प्रयोग गरेर किसानलाई हौसला दिन आग्रह गरेका छन् । उनले आसन्न चाडपर्वमा नेपालमै उत्पादित दूध तथा दुग्धजन्य पदार्थ, मह, अन्डा, मासु साथै फलफूल प्रयोग गर्न अपिल गरेका छन् ।

कृषिमन्त्री अधिकारीले तिहार तथा नेपाल संवत् नयाँ वर्ष तथा छठ पर्वको शुभकामना दिँदै यस्तो अपिल गरेका हुन् । तपाईंहरूको सानो सहयोगले कृषि पेसामा संलग्न हाम्रा दिदीबहिनी तथा दाजुभाइहरूलाई ठूलो हौसला मिल्ने छ,’ मन्त्री अधिकारीले जारी गरेको शुभकामना सन्देशमा छ ।

मन्त्री अधिकारीका अनुसार रोजगारी र अवसरका लागि विदेशिने क्रममात्र चलेको छैन, देशमै केही हुन्छ र गर्नुपर्छ भन्ने सोच पनि बढ्दै गएको छ । त्यसकै मिहिनेत र पौरखका कारण नेपाल मासु, अन्डामात्र होइन, दूध तथा दुग्धजन्य पर्दाथमा बिस्तारै आत्मनिर्भर बन्दै गएको छ । तरकारी, फलफूल तथा अन्नबाली उत्पादन बढ्दै गएका छन् ।

‘तर, स्वदेशी उत्पादनहरूको उपभोग कम हुने तथा दूध, उखु सहितका किसानले महिनौंसम्म रकमका लागि प्रतीक्षा गर्नुपर्ने अवस्था विद्यमान् छ । त्यसको अन्त्यका लागि दुग्ध विकास संस्थान (डीडीसी) मा मौज्दात घिउसहित दूधबाट उत्पादित वस्तु बिक्री गर्नुपर्ने आवश्यकता छ भने निजी क्षेत्रबाट सञ्चालित डेरीहरूमा अहिले पनि दूधबाट उत्पादित वस्तु थन्किएका छन्,’ शुभकामना सन्देशमा छ, ‘मह, स्याउ सहित हाम्रा उत्पादन बजारको प्रतीक्षामा छन् भने अन्डा तथा मासुजन्य वस्तुको अवस्था पनि करिब उस्तै छ । जसले गर्दा किसानले समयमा भुक्तानी नपाउने मात्र होइन, स्वदेशी वस्तु प्रयोग कम हुँदा हाम्रा उत्पादन सडेर जाने र किसान पलायन हुने अवस्था आउन थालेको छ ।’

स्वदेशी उत्पान खपत बढाउन सके उत्पादित वस्तु बिग्रिन नपाउने र किसानले भुक्तानीका लागि लामो समय पर्खनुपर्ने अवस्था अन्त्य हुने मन्त्री अधिकारीको भनाइ छ । दूध, घिउसहित स्वदेशमै उत्पादित वस्तु भरपुर उपयोग गर्न उनले अपिल गरेका छन् । त्यसैगरी खेतीयोग्य मध्ये १० लाख ३० हजार हेक्टर जमिन अहिले पनि बाँझो रहेको र दैनिक उपभोग्य वस्तुको ठूलो हिस्सा विदेशबाट आयात गर्नुपर्ने अवस्था अन्त्यका लागि कृषि उपज उत्पादन र उत्पादकत्व वृद्धि गर्नु अहिलेको आवश्यकता र प्राथमिकता भएको उनले बताए ।

उनले भनेका छन्, किसानलाई सहज र समयमा मल, बीउ र बजारको उपलब्धता मात्र होइन, सहज लगानीको वातावरण बनाउन सक्नुपर्छ । त्यसले मात्र कृषि पेसामा युवालाई आकर्षण गर्न सकिन्छ । कामको खोजीमा विदेसिने क्रम रोकिने छ भने बाँझिएको जमिनमा खेती लाग्ने अवस्था बन्ने छ । माग र आपूर्तिका आधारमा स्थानीय, प्रदेश र संघीय सरकारको समन्वयमा निजी तथा सहकारीसँगको साझेदारीमा सामूहिक तथा व्यावसायिक खेती प्रोत्साहन गर्दै मुलुकलाई आधुनिक कृषि प्रणालीमा लैजान सकेमात्र देशभित्र आवश्यक पर्ने सबै अन्नबाली, तरकारी तथा फलफूलको आवश्यकता पूर्ति गर्न सकिन्छ ।’