म्याद सकिए पनि हिरासतमै वित्ने भो रविको तिहार, २० गते मात्र अदालत लगिने

१५ कात्तिक पोखरा । सूर्यदर्शन सहकारीको रकम अपचलनमा संलग्न आरोपमा पक्राउ परेका राष्ट्रिय स्वतन्त्र पार्टीका सभापति रवि लामिछानेको तिहार हिरासतमै वित्ने भएको छ । उनलाई अदालतले अनुसन्धान गर्न दिइएको म्याद सकिएको छ । थप म्याद थप गर्न आज उनीलाई अदालत लानुपर्ने थियो तर, सार्वजनिक विदा सुरु भएको छ । 

दोस्रो पटक कास्की जिल्ला अदालतले गत बिहीबार उनीमाथिको अनुसन्धानका लागि थप ७ दिन हिरासतमा राख्न प्रहरीलाई अनुमति दिएको थियो । कात्तिक १५ गते उनलाई म्याद थप गर्न लानुपर्ने थियो । तिहार बिदा सुरु भएकाले अब उनलाई बिदापछि कात्तिक २० गतेमात्र अदालत लगिने छ । 
 
लामिछानेको बयान भने सकिएको छ । बुधबार अबेर बयान पुरा गरेर जिल्ला सरकारी वकिल कार्यालयकी जिल्ला न्यायाधिवक्ता कमला काफ्ले र अनुसन्धान अधिकृत (डीएसपी) बसन्त शर्माले बयान प्रमाणित गरेका छन् । उनीसँग ९ दिनसम्म बयान लिइएको थियो । बयानमा लामिछानेले सूर्यदर्शनबाट आफुले कुनै ऋण नलिएको दावी गरेका छन् । 

लामिछानेविरुद्ध पोखराको सूर्यदर्शनसहित ५ वटा सहकारीबाट बचतकर्ताको रकम अनियमितता भएको प्रकरणमा अनुसन्धान सुरु हुँदैछ । कास्कीमा भएको अनुसन्धान सकिएलगत्तै उनलाई अन्यत्रका सहकारी ठगी प्रकरणमा पनि अनुसन्धान गर्ने तयारी गरिएको छ । त्यसका लागि तयारी थाल्न सम्बन्धित जिल्लाहरुलाई निर्देशन दिइसकिएको छ ।