१० बुँदे एजेण्डा बोकेर कांग्रेसका युवा नेताले मेची-महाकाली युवा संकल्प यात्रा गर्ने

१९ कात्तिक, काठमाडौं । नेपाली कांग्रेसका युवा नेताहरुले मेची-महाकाली संकल्प यात्रा सुरु गर्ने भएका छन् । युवा नेता भुपेन्द्रजंग शाहीको नेतृत्वमा मेची-महाकाली युवा संकल्प यात्रा गर्न लागिएको हो । यही कात्तिक २३ गते झापाको मेचीनगरबाट सुरु हुने यात्रा मंसिर ४ गते महेन्द्रनगरमा पुगेर समापन गरिने भएको छ । 

युवा संकल्प यात्राका बारेमा जानकारी दिन सोमबार काठमाडौंमा पत्रकार सम्मेलन गर्दै नेता शाहीले युवालाई रोजगारीको सुनिश्चितता, भ्रष्टाचार उन्मुलन र सुशासन, महँगी र मूल्यबृद्धी नियन्त्रण, उद्यमशीलता, नवप्रवर्तन र कृषिमा लगानी, सहकारी पीडितलाई तत्काल राहत र बचत फिर्ता, विभिन्न संस्था तथा सहकारी ठगलाई कारबाही लगाएतका १० बुँदे एजेण्डाका साथ युवा संकल्प यात्रा आयोजना गरिएको बताए ।

स्वदेशमै शिक्षा र स्वदेशमै रोजगारीको सुनिश्चितताका लागि युवा संकल्प यात्राले आवश्यक पहल र दवावको अगुवाई गर्ने उनले बताए । त्यस्तै तीनै तहका सरकारमा व्याप्त भ्रष्टाचार उन्मुलन र सुशासनको स्थापनाका लागि आवश्यक पहल र खबरदारी गर्ने भन्दै शाहीले सयौं सहकारीमा लाखौं नेपालीले बचत गरेको अर्बौ रुपैयाँ बचत फिर्ता गराउन युवा संकल्प यात्राले जस्तोसुकै पहल गर्ने बताए ।

त्यस्तै सहकारी ठग जो भएपनि, जुनसुकै पार्टीको भएपनि कारवाही गराउन युवा संकल्प यात्राले दवाव सिर्जना गर्ने उनको भनाइ छ ।  सरकारलाई नागरिक मैत्री बनाउन पहल र प्रयत्न दुवै युवा संकल्प यात्राले गर्ने, युवा संकल्प यात्राले नागरिक जीवन सहज बनाउने सन्दर्भमा उचित अग्रसरता लिने जिकिर गर्दै उनले यात्राका क्रममा प्राप्त सल्लाह, सुझाव र अनुभवलाई दस्तावेजीकरण गरेर युवा हितका क्षेत्रमा निरन्तर काम गरिने शाहीले बताए ।