गृहमा पुग्यो पूर्व डीएसपी श्रेष्ठलाई पीसीसी बैठकमा सहभागी गराएको विषय, फेरी विवादमा आईजीपी !

२० कात्तिक, काठमाडौं । संगठनभित्रकै कतिपय विषयमा विवाद उत्पन्न हुने गरी कार्य गर्दै आएका नेपाल प्रहरीका महानिरीक्षक वसन्तबहादुर कुँवर पीसीसी बैठकमा असम्बन्धित व्यक्तिलाई सहभागी गराएको विषयले फेरी विवादमा तानिएका छन् । यो विषयले मंगलबार गृह मन्त्रालयमा पनि चर्चा पाएको छ । मंगलबार एआईजी टेकप्रसाद राईसहित गृहमा भएको एउटा छलफलमा पीसीसी बैठकमा गैरप्रहरी कसरी सहभागी भए भन्ने प्रश्न उठेको स्रोतले बतायो । 

पीसीसी बैठक भनेको नेपाल प्रहरीको नीति बनाउने पोलिसी कोअर्डिनेसन कमिटीको बैठक हो । यसले नेपाल प्रहरीका लागि संगठन परिचालनदेखि विभिन्न आन्तरिक विषयहरूमा नीति र नियम बनाउने गर्छ । निश्चित अधिकारीबाहेक अरूले यसमा प्रवेश गर्न पाउँदैनन् । तर, नेपाल प्रहरीका एक पूर्व डीएसपी यो बैठकमा कसरी सहभागी भए र उनलाई कस्को आदेशमा उपस्थित हुन दिइयो भन्ने प्रश्न उठेको छ । धेरै प्रहरी अधिकारीहरूले यसमा प्रहरी प्रवक्ता दानबहादुर कार्कीलाई दोषी देखाएका छन् ।    

प्रहरी उच्च स्रोतका अनुसार बिहीबार बसेको पीसीसी बैठकमा माओवादी द्वन्द्वकालमा प्रहरीको जागिर छाडेर विदेश पलायन भएका पूर्व प्रहरी नायब उपरीक्षक (डीएसपी) शिवजी श्रेष्ठलाई सहभागी गराइएको थियो । बैठकमा सहभागी भएपछि श्रेष्ठ आफैले फेसबुक मार्फत यो विषय सार्वजनिक गरेका थिए । उनी पीसीसी बैठकमा सहभागी भएको विषयमा गृहमन्त्री रमेश लेखकले समेत चासो दिएका छन । उनले चासो राखेर यस्तो अनैतिक काम कसले र किन गरेको भन्दै प्रश्न गरेका छन् । 

 
प्रहरी महानिरीक्षक कुँवरले बेलायत जानुअघि पीसीसी बैठक राखेका थिए । इन्टरपोलको ९२ औं महासभामा सहभागी हुन आइतबार उनी संयुक्त राज्य बेलायततर्फ प्रस्थान गरेका छन् । इन्टरपोल महासचिवालयको आयोजनामा संयुक्त राज्य बेलायतको ग्लास्गोमा कात्तिक १९ देखि २२ गतेसम्म संचालन हुने उक्त महासभामा सहभागी हुन प्रहरी महानिरीक्षक कुँवर बेलायत गएका हुन् । उनीसँगै सशस्त्र प्रहरी नायव महानिरीक्षक अन्जनी कुमार पोखरेल र इन्टरपोल शाखाका प्रमुख प्रहरी उपरीक्षक कोमल शाह पनि गएका छन् ।  

शिवजी श्रेष्ठले सामाजिक संजालमा आफू नेपाल प्रहरीको पीसीसी बैठकमा सहभागी भएको तस्वीर राखेका छन् । सामान्यतया पीसीसी बैठकको तस्वीर कहीँ कतै कसैले पनि सामाजिक संजालमा शेयर गर्न नमिल्ने प्रहरी अधिकारीहरू बताउँछन् । तर श्रेष्ठले भने बिहीबारै उक्त तस्वीर सामाजिक संजालमा सार्वजनिक गरेका थिए । श्रेष्ठ र कुँवर पछिल्लो समय मर्निङवाकमा पनि एक साथ भेटिने गरेका छन् । 

प्रहरी स्रोतका अनुसार पूर्व भगौडा डीएसपी श्रेष्ठलाई पीसीसी बैठकमा सहभागी गराउने हात नेपाल प्रहरीका प्रवक्तासमेत रहेका डीआईजी दानबहादुर कार्कीको हो । शिवजी श्रेष्ठ द्वन्द्वकालका रुकुममा डीएसपी हुँदा ५ जना गाई गोठालालाई माओवादी भनेर निर्मम हत्या गरेको आरोप लागेको थियो । द्वन्द्वकालमा प्रहरीको जागिरबाट भागेर उनी बेलायत पलायन भएका थिए । बेलायतमा पलायन भएका उनी हरेक बर्ष हुने गैरआवासीय नेपाल संघ (एनआरएनए)को कुम्भमेलामा भाग लिन आएको समयमा डीआईजी कार्कीको योजनामा पीसीसी बैठकमा सहभागी गराइएको प्रहरीका एक अधिकारीले बताए । 

प्रहरीको नीति बनाउने पीसीसी बैठकमा डीआईजीदेखि माथिल्लो पदका प्रहरी अधिकृतमात्र सहभागी हुन पाउँछन् । तर भगौडा डीएसपी श्रेष्ठलाई के आधारमा, कुन हैसियतमा पीसीसी बैठकमा सहभागी गराइयो भन्ने प्रश्न उठेको छ । यही विषयले महानिरीक्षक कुँवर फेरी विवादमा तानिएका छन् । उनी फर्किएपछि गृहमन्त्री लेखकले यो विषयमा सोधपुछ गर्ने बताइएको छ । बहालवाला भएपनि डीएसपी यो बैठकमा सहभागी हने व्यवस्था छैन । नेपाल प्रहरीका एआईजी टेकप्रसाद राईसँग यस विषयमा जानकारी लिन खोज्दा उनले आफू गृहको मिटिङमा भएको बताए । उनले म्यासेज पठाएर अहिले बैठकमा भएकाले बोल्न नमिल्ने जानकारी दिए ।  

ओखलढुंगा घर भएका श्रेष्ठलाई डीआईजी कार्कीले प्रहरीको नीति बनाउने पीसीसी बैठकमा सहभागी गराएको र कार्कीले पछिल्ला दिनमा उनीसँग हिमचिम बढाएको प्रहरी स्रोतको भनाइ छ । आईजीपी कुँवरसँग मर्निङवाक गराउनेदेखि बाक्लो भेटघाट मिलाउने काम पनि कार्कीकै समन्वयमा हुने गरेको बताइएको छ । आईजीपी कुँवरसँग कपन गुम्बादेखि विभिन्न ठाउँमा वाकिङमा गएको तस्वीरसमेत शिवजी श्रेष्ठले सामाजिक संजालमा राखेका छन् । प्रवक्ता कार्कीकै कारण कतिपय विषयमा आइजीपी कुँवर पनि विवादमा तानिँदै आएका छ ।  

नोटः भित्रका तस्वीर सबै शिवजी श्रेष्ठको फेसबुकबाट