ससुरालीमा लुकेर बसेको अवस्थामा पोखराको मित्र मिलन सहकारीका उपाध्यक्ष लम्साल पक्राउ

२१ कात्तिक, पोखरा । पक्राउ पुर्जी जारी भएपछि फराररहेका पोखराको मित्र मिलन बचत तथा ऋण सहकारी लिमिटेडका उपाध्यक्ष विजय लम्साललाई प्रहरीले पक्राउ परेका छन् । उनी ससुरालमा लुकेर बसेको अवस्थामा पक्राउ परेका हुन् । सहकारी ठगी आरोपमा जिल्ला अदालत कास्कीले उनलाई पक्रन पक्राउ पुर्जी जारी गरेको थियो । 
सहकारीको ३१ करोड बिगो दाबीसहित ३२ जनाविरुद्ध जिल्ला प्रहरी कार्यालय कास्कीले सरकारी वकिलको कार्यालयमा पेस गरेको थियो । सरकारी वकिल कार्यालयले गत वर्ष जिल्ला अदालत कास्कीमा मुद्दा दर्ता गराएको थियो । उनी मंगलबार पक्राउ परेका हुन् । 

फरार लम्साललाई पोखरा महानगरपालिका–२ अर्चलबोटस्थित ससुरालीबाट पक्राउ गरिएको हो । जिल्ला प्रहरी कार्यालय कास्कीका अनुसार सहकारी ठगीमा संलग्न रहेका लम्साल लामो समयदेखि फरार थिए । उक्त सहकारीमा ठगी प्रकरणमा अध्यक्ष रमण पौडेल, कार्यकारी अधिकृत किरण अधिकारी, अर्जुन गिरी, सञ्चालक सदस्य गोपाल खनालसहित केही पुर्पक्षका लागि थुनामा छन् ।