इजरायलको राजदूतमा धनप्रसाद पण्डित नियुक्त

२१ कात्तिक, काठमाडौं । धनप्रसाद पण्डित इजरायलको राजदूतमा नियुक्त भएका छन् । राष्ट्रपति रामचन्द्र पौडेलले इजरायलको राजदूतमा प्राध्यापक पण्डितलाई नियुक्त गरेका हुन् । मन्त्रिपरिषद्को सिफारिस र संसदीय सुनुवाइ समितिको अनुमोदनपछि राष्ट्रपतिले पण्डितलाई बुधबार राजदूतमा नियुक्त गरेका हुन् । 

राष्ट्रपति कार्यालयका सूचना अधिकारी अर्चना खड्का अधिकारीकाअनुसार राष्ट्रपतिले नेपालको संविधानको धारा २८२ उपधारा (१) बमोजिम नेपाल सरकार, मन्त्रिपरिषद्को सिफारिसमा प्राध्यापक पण्डितलाई इजरायलका लागि नेपालको आवासीय राजदूत पदमा नियुक्त गरेका हुन् ।

संसदीय सुनुवाइका क्रममा पण्डितले इजरालय गएपछि प्यालेस्टाइन युद्ध अन्त्यका लागि पहल गर्ने बताएका थिए । प्यालेस्टाइनलाई पनि बाँच्न दिनुपर्ने पण्डितको भनाइ थियो ।