राष्ट्रिय योजना आयोगमा सिर्जना गरिएको विशेष पदमा नै हाजिर हुने भए बैकुण्ठ अर्याल

२१ कात्तिक, काठमाडौं । भ्रष्टाचार मुद्दामा हालै सफाइ पाएका मुख्यसचिव बैकुण्ठ अर्याल राष्ट्रिय योजना आयोगमा सिर्जना गरिएको विशेष पदमै हाजिर हुने भएका छन् । उनले प्रधानमन्त्री तथा मन्त्रिपरिषदको कार्यालयबाट राष्ट्रिय योजना आयोगका लागि रमानापत्र लिएका छन् । १४ कात्तिकमा भ्रष्टाचार मुद्दामा सफाइ पाएका उनी अब सो रमानापत्र अनुसार राष्ट्रिय योजना आयोगमा हाजिर हुन लागेका हुन् । 

अर्यालले सफाइ पाएको अवस्थामा प्रधानमन्त्री तथा मन्त्रिपरिषदको कार्यालयमा अब कुन मुख्यसचिवले काम गर्न पाउँछन् भन्ने अन्योल थियो । निजामती कर्मचारी ऐनलगायत प्रचलित ऐनमा यस्तो अवस्था आउने परिकल्पना नै गरिएको छैन, त्यसैले यस्तो अवस्थामा के गर्ने भन्ने अन्योला भएको थियो । बैकुण्ठ अर्याल प्रधानमन्त्री कार्यालयको मुख्यसचिवको पुरानै भूमिकामा फर्किन मन्त्रिपरिषदले अर्को निर्णय गर्नुपर्ने थियो । तर, प्रधानमन्त्री कार्यालयले अर्याललाई रमाना दिएसँगै अब उनी योजना आयोगमै रहने निश्चित जस्तै भएको छ । 

सरकारको सरुवा र रमानाको निर्णयविरुद्ध अदालत जाने विकल्प भने मुख्यसचिव डा. बैकुण्ठ अर्यालसँग रहेको छ । अहिले डा. बैकुण्ठ अर्याल र एकनारायण अर्याल दुवै जना नेपाल सरकारको विशिष्ट श्रेणीको मुख्यसचिव वा सरहको पदमा कायम छन् । यस्तो अवस्थामा १० असारको मन्त्रिपरिषदको निर्णय अनुसार नै अर्याललाई योजना आयोगमा सिर्जित विशेष दरबन्दीका लागि रमाना दिइएको हो । 

अन्तःशुल्क स्टिकर छपाइमा भएको भ्रष्टाचारमा संलग्न भएको आरोपमा गत ९ असारमा अख्तियार दुरुपयोग अनुसन्धान आयोगले दायर गरेको मुद्दामा अर्यालले विशेष अदालतबाट सफाइ पाएका थिए ।  मुद्दा जितेसँगै निलम्बन फुकुवा भएकाले उनी पुनः सरकारी जिम्मेवारीमा फर्किएका छन् । अर्यालविरुद्ध भ्रष्टाचार मुद्दा दर्ता भएको भोलिपल्ट १० असारमा मन्त्रिपरिषद बैठकले योजना आयोगमा विशिष्ट श्रेणीको मुख्यसचिव सरहको पद सिर्जना गर्दै उनलाई सरुवा गरेको थियो ।