ललितपुरको भैँसेपाटीमा मैत्री योग स्टुडियोको उद्घाटन

२२ कात्तिक, ललितपुर । ललितपुरको भैँसेपाटीमा मैत्री योग स्टुडियोको उद्घाटन गरिएको छ । नेपाल सरकारका उपप्रधान तथा अर्थमन्त्री विष्णु पौडेलले योग स्टुडियोको उद्घाटन गरेको हो । 

उक्त उद्घाटन समारोहमा मन्त्री पौडेलसहित ललितपुर महानगरपालिकाकी उपप्रमुख मञ्जली शाक्य, ललितपुर महानगरपालिका वडा नं. १८ का वडाअध्यक्ष दामोदर खड्का, वडा नं. २५ का अध्यक्ष दौलत कुमार खत्री आदिको उपस्थिति रहेको थियो । 

समारोहमा सम्बोधन गर्दै उपप्रधान तथा अर्थमन्त्री पौडेलले योग गुरुहरूको प्रवचन र योग जागरणमार्फत नेपालमा योगलाई स्वास्थ्य जीवन बनाउने उर्जाको रुपमा ग्रहण गर्नुपर्ने बताए । उनले स्वस्थ मन र स्वस्थ शरीरका लागि सबैले आफैंले समय छुट्याउनुपर्ने तथा स्वस्थ समाज निर्माणमा सहयोग पुर्याउनुपर्नेमा जोड दिए । 

मन्त्री पौडेलले पछिल्लो समय समाजमा विरोधमा रमाउने प्रवृत्तिलाई सिर्जना भएकोले ध्यान र योगमार्फत स्वस्थ आलोचनामा सहभागी हुने शक्ति मिल्ने भनाई राखे । 

ललितपुर महानगरपालिकाकी उपप्रमुख मञ्जली शाक्यले ध्यान र योग भनेको आफूले आफूलाई बुझ्ने चिन्ने विषय भएको बताइन् । योग र ध्यान अरूलाई अह्राएर गर्न नमिल्ने भएकोले दैनिक कम्तीमा आधा घण्टाको समय आफ्नै लागि छुट्याउनुपर्नेमा उनको जोड थियो । उपप्रमुख शाक्यले मनलाई ध्यान र योगले शुद्ध गर्न सहयोग पुग्ने र यसले परिवारलाई समेत स्वस्थ राख्न सहयोग पुर्याउने भाव व्यक्त गरिन् । 

करिब ५० जनाले योग गर्न सकिने उक्त स्टुडियोमा नियमित रुपमा बिहान, दिउँसो र साँझको समयमा योग अभ्यास र प्रशिक्षण गरिने उक्त स्टुडियोका सञ्चालक ज्ञानभक्त डंगोलले जानकारी दिए ।