इन्सपेक्टर शाही जोडिएको घटनामा उच्चअधिकारी मुछिएपछि सीआईबीले थाल्यो अनुसन्धान

२२ कात्तिक, काठमाडौं । भैंसेपाटी प्रहरी प्रभागकी तत्कालीन प्रहरी निरीक्षक बिनुकुमारी शाही जोडिएको ‘हनी ट्रयाप’ प्रकरणको अनुसन्धान सीआईबीले सुरु गरेको छ । प्रहरी प्रधान कार्यालयले यो घटनामा एसपीसम्म मुछिन पुगेपछि केन्द्रीय अनुसन्धान ब्यूरो (सीआईबी) लाई घटना अनुसन्धानको जिम्मा दिएको हो । ललितपुर प्रहरीका अनुसार बुधबार अनुसन्धानका लागि पक्राउ परेका चारै जना सीआईबीको जिम्मा लगाइएको छ । 

बलात्कार मुद्दामा फसाई दिने भन्दै भैसेपाटी प्रभागकी इन्सपेक्टर शाहीसँग मिलेर एक व्यवसायीसँग ३० लाख असुली गरेको घटना विस्तारै प्रहरीका माथिल्ला अधिकारीसम्म पुगेको थियो । सुरुमा घटनाको विषयमा छानबिन समितिसमेत गठन भएको थियो । डीएसपी नरहरि अधिकारीको नेतृत्वमा समिति गठन गरी छानबिन अघि बढाइएको थियो । पछि  नेपाल प्रहरीका एसपी कमल थापामाथि पनि अनुसन्धान गर्नुपर्ने देखिएपछि प्रहरी प्रधान कार्यालयले थप अनुसन्धानका लागि सीआईबीलाई जिम्मेवारी दिएको हो । 

एक जना व्यापारीलाई बलात्कारको मुद्दामा फसाउने भन्दै ३० लाख असुली गरेको घटनामा सुष्मा विक, ताज मुल इस्लाम, भीमादेवी थापा र प्रहरी सहायक हवल्दार महेन्द्र हमाल प्रहरीको हिरासतमा छन् । उनीहरूमाथि आपराधिक लाभ लिन नहुने कसुर र संगठित अपराधमा अनुसन्धान भइरहेको प्रहरीले जनाएको छ । संगठित अपराधमा प्रहरीले प्रतिवादीहरूलाई एक महिनाभन्दा बढी समय लगाएर अनुसन्धान गरिसकेको छ ।

अनुसन्धानकै क्रममा प्रहरी प्रभाग भैंसेपाटीमा इन्चार्ज हुँदा घटना भएको खुलेपछि प्रहरी निरीक्षक बिनुकुमारी शाहीलाई निलम्बन गरी पक्राउ पुर्जी जारी गरिएको थियो । तर उनी अझै फरार नै छन् । अनुसन्धानकै बीच एसपी कमल थापा समेतको नाम जोडिएको छ । प्रहरीका सिनियर अधिकारीसमेत जोडिएको र अन्तरजिल्लाको समेत घटना जोडिएपछि ललितपुर प्रहरीले सीआईबीलाई अनुसन्धान गर्ने जिम्मा दिएको हो ।

प्रहरीका अनुसार एसपी थापा जिल्ला प्रहरी कार्यालय सुनसरीमा रहँदैबाट इस्माइलसँग परिचित थिए । अनुसन्धानका क्रममा एसपी थापाको स्माइलसँग पटकपटक भेटघाट र कुराकानी हुने गरेको समेत भेटिएको थियो । प्रहरी प्रधान कार्यालयले गरेको जाँचमा पनि केही नयाँ तथ्यहरू खुलेका छन् । आरोपी इस्लामको समूहले एक जना युवती प्रयोग गरेर पूर्वका व्यवसायीसँग बलात्कारको मुद्दा लगाइदिने भन्दै बार्गेनिङ गरेको थियो । प्रहरी समेतको उपस्थितिमा ६० लाख रुपैयाँबाट बार्गेनिङ सुरु भएपनि अन्तिममा ३० लाखमा सहमति गरेको अनुसन्धानबाट खुलेको छ ।