दीपक मनाङेलाई चाँडै पक्राउ गर्ने प्रहरीको तयारी

२२ कात्तिक, काठमाडौं । सर्वोच्च अदालतबाट ज्यान मार्ने उद्योगमा दोषी ठहर भएका गण्डकी प्रदेश सभाका सांसद एवं पूर्वमन्त्री रहेका दिपक मनाङेलाई प्रहरीले पक्राउ गर्ने तयारी गरेको छ । कात्तिक २० गते (मंगलबार) सर्वोच्च अदालतले उच्च अदालतको आदेश सदर गरे सँगै पाँच वर्ष कैद सजाय हुने भएपछि मनाङे मंगलबारबाटै ‘फरार’ छन् ।

उनी हाल सम्पर्कविहीन रहेका छन् ।  अहिले मनाङे पक्राउका निम्ति प्रहरीका तीन युनिट सक्रिय भएका छन् ।  उपत्यका अपराध अनुसन्धान कार्यालय टेकु, जिल्ला प्रहरी परिसर, भद्रकाली र जिल्ला प्रहरी कार्यालय कास्कीको टोलीलाई प्रहरी प्रधान कार्यालयले उनको खोजीकार्यका निम्ति निर्देशन दिएको छ ।

उनी छिट्टै पक्राउ पर्ने केन्द्रीय प्रहरी प्रवक्ता दानबहादुर कार्कीले बताए ।  फैसलाको संक्षिप्त पाठ माग गरेको र त्यो हात पर्ने बित्तिकै पक्राउ गरिने कार्कीले बताए । प्रधान कार्यालयको निर्देशन पाउनासाथ जिल्ला प्रहरी परिसर काठमाडौंले बुधबार नै सर्वोच्च अदालतमा उक्त मुद्दाको संक्षिप्त आदेश माग गर्दै पत्राचार गरेको छ ।  

मनाङे मुख्य योजनाकार रही २०६१ वैशाख २१ गते चक्रे मिलन नामले चिनिने गुण्डानाइके मिलन गुरुङमाथि धारिलो हतियार प्रहार भएको थियो । घटनापछि गुरुङपत्नी इन्दिराले दिएको जाहेरीका आधारमा उनीमाथि कुटपिटको मुद्दा चल्यो । सोही मुद्दा २० वर्षदेखि चल्दै आएको हो ।

पहिला कुटपिटको महलमा चलेको उक्त मुद्दामा मनाङे पहिलोपटक २४ र अर्कोपटक ८ महिना थुनामा रहिसकेका छन् । पछि सोही घटनलाई ज्यान मार्ने उद्योगका रुपमा उच्च अदालतले स्वीकार गरेपछि पाँच वर्ष कैद तोकिएको थियो । अब मनाङेले कानुनतः २८ महिनाको कैद मुक्तान गर्न बाँकी छ ।