दैलेखमा कांग्रेसले भण्डारी र शाहीलाई बनायो उम्मेदवार

२३ कात्तिक, काठमाडौं । नेपाली कांग्रेसले आगामी मंसिर १६ गते हुने उपनिर्वाचनका लागि दैलेखको महावु गाउँपालिकाको अध्यक्ष र दुल्लु नगरपालिका–१३ को वडाअध्यक्ष पदको उम्मेदवारको टुंगो लगाएको छ । नेपाली कांग्रेस दैलेखले महावु गाउँपालिकाको अध्यक्षको उम्मेदवारका लागि झलकबहादुर भण्डारी र दुल्लु नगरपालिका–१३ को वडाअध्यक्ष पदमा रेशमबहादुर शाहीलाई उम्मेदवार बनाएको हो ।   

यसअघि महावुमा कांग्रेसले जितेको थियो भने दुल्लु –१३ मा एमालेले जितेको थियो । नेकपा एमालेमा उपनिर्वाचनमा दाबेदार बढी भएकाले उम्मेदवार टुंगाउन सकेको छैन । नेपाली कांग्रेसबाट निर्वाचित महाबु गाउँपालिका अध्यक्ष लछुमन गुरुङको ७६ वर्षको उमेरमा २०७९ माघ २७ गते निधन भएको थियो । त्यसैगरी एमालेबाट निर्वाचित दुल्लू नगरपालिका–१३ वडाका वडाध्यक्ष बिर्खबहादुर शाहीको ६५ वर्षको उमेरमा २०८० माघ २२ गते निधन भएको थियो ।