कोशीका मन्त्रीले मानव तस्करी गरे कि फन्दामा परे, प्रहरी भन्छः अनुसन्धान हुँदैछ, को हुन अनिता ?

२३ कात्तिक, काठमाडौं । कोशी प्रदेशका निवर्तमान आन्तरिक मामिला तथा कानुन मन्त्री लीलाबल्लभ अधिकारी जापान जाँदा अन्य तीन जना पनि काठमाडौंबाट सँगै गएका थिए । अधिकारीले आफूसँगै जापान पुगेका तीन जनालाई हङकङमा भेटेको दाबी गरे पनि त्रिभुवन अन्तर्राष्ट्रिय विमानस्थलको रेकर्डले चारै जना एउटै जहाजमा गएको देखिएको छ । उनीहरूमाथि शंका लागेपछि जापानको अध्यागमन कार्यालयले विमानस्थलबाटै फिर्ता गरिदिएको थियो । यसले निवर्तमान मन्त्री अधिकारीमाथि मानव तस्करीमा अनुसन्धान गर्नुपर्ने देखिन्छ । नेपाल प्रहरीले उनीहरूमाथि अनुसन्धान भइरहेको जनाएको छ ।

बुधबार पत्रकार सम्मेलनमा अधिकारीले आफूले अन्य तीन जनालाई हङकङ विमानस्थलमा भेटेको दाबी गरे पनि चारै जना एउटै उडानबाट गएका थिए । त्रिभुवन विमानस्थल स्रोतका अनुसार अक्टोबर २७ मा चारै जना फरक–फरक समय पारेर विमानस्थल प्रवेश गरे । तर उनीहरू क्याथे प्यासिफिककै एउटै उडानमा  हङकङ हुँदै जापान पुगेका थिए । तर फर्कने बेलामा अनिता तिमल्सिना पनि सँगै थिइन । प्रहरीले मन्त्रीसँगै फर्केकी तिमल्सिना को हुन भन्ने खुलाएको छैन । उनलाई मन्त्रीले नै लिएर गएका हुन वा एक्लै गएर डिपोर्टमा परेकी हुन त्यस बारेमा बाहिर केही आएको छैन । महानगरीय प्रहरी अपराध अनुसन्धान कार्यालयले यो विषयमा पनि अनुसन्धान गरिरहेको छ ।

खोटाङ ऐँसेलुखर्क गाउँपालिकाको वडा सदस्यकाे परिचयपत्र बनाएका दावा शेर्पाले २७ तारिखमा राति करिब ८ बजेर १६ मिनेटमा अध्यागमन पार गरेको देखिएको छ । आन्तरिक मामिला मन्त्रालयको सहायक पदको परिचयपत्र बनाएका जनक राई र नुवाकोटका कन्चन देवकोटाले एकै साथ अध्यागमन पार गरेका थिए । विमानस्थल स्रोतका अनुसार मन्त्री अधिकारी भने करिब साढे ६ बजे नै पुगेका थिए । जाने टिकट, उड्ने जहाज र समय एउटै बनाएर मन्त्रालयको परिचयपत्रसमेत बोकेका व्यक्तिहरू मन्त्रीसँगै देखिएकाले हङकङमा भेटेको भन्नु गलत भएको अनुसन्धानमा संलग्न प्रहरीको दावी छ ।

२७ तारिखमा नेपालबाट उडान गरे पनि मन्त्रीसहित सबैलाई जापान अध्यागमनले नियन्त्रणमा लिएर ३० तारिखमा मात्रै फिर्ता गरिदिएको थियो । ४८ घण्टासम्म विमानस्थलमै नियन्त्रणमा राखेर फिर्ता गरिएकालाई जुन जहाजमा गएको हो, त्यसैमा फर्काइएको थियो । जापान अध्यागमनले नेपालको अध्यागमन कार्यालयलाई उनीहरुलाई फिर्ता गर्नुको कारण खुलाएरै पत्र लेखेको छ ।

पत्रमा मन्त्री अधिकारी र अन्य ३ जना जापान सँगै पुग्नु, अधिकारी सहभागी हुने तय भएको कार्यक्रम र साथमा रहेकाहरूको जापानमा तय कार्यक्रमबीच तालमेल नभएकाले शङ्कास्पद देखिएको पत्रमा खुलाइएको स्रोतको भनाइ छ । अधिकारीसँगै जापान पुग्ने तीन जना १५ दिनको भ्रमण भिसा लिएर गएका थिए । उनीहरुको भ्रमण भिसा रद्द गरे पनि कार्यक्रममा गएका भनिएका मन्त्रीलाई पनि सँगै फर्काउनुले मानव तस्करीमा साथ दिएको देखिएकाले अनुसन्धान गर्नुपर्ने प्रहरी अधिकृतहरूको भनाई छ ।

नक्कली परिचयपत्र बनाइदिएको आरोपमा प्रहरीले थप तीन जनालाई पक्राउ गरेर अनुसन्धान अघि बढाएको छ । यो समूहले जापानमा मानव तस्करीको ठूलै सञ्जाल चलाएको हुन सक्ने भएकाले विस्तृत अनुसन्धान गर्नुपर्ने दबाब बढेको हो । मन्त्रीसँगै गएर फिर्ता गरिएकाहरुले १० देखि १३ लाख बुझाएको खुलिसकेको छ । धादिङको त्रिपुरा–सुन्दरी गाउँपालिका– ६ का महेश पाण्डेलाई जनही १० लाखदेखि १३ लाख रुपैयाँका दरले रकम बुझाएको पक्राउ परेकाहरूले बयान दिएका छन् । उक्त रकम अधिकारी कहाँ पुगे–नपुगेको विषयमा भने अनुसन्धान भइरहेको प्रहरीले जनाएको छ । ‘जापानसम्म पुर्याउने, टिकटको व्यवस्था गर्ने, नक्कली कागजात बनाउने, भिसा उपलब्ध गराउनेसम्मको प्रयोजनका लागि महेशले युवाबाट प्रतिव्यक्ति १० देखि १३ लाख रुपैयाँका दरले रकम असुलेको देखिन्छ ।

यसको हिस्सा निवर्तमान मन्त्री अधिकारी कहाँ पुग्यो–पुगेन भन्ने विषयमा अनुसन्धान भइरहेको छ’, अनुसन्धानमा संलग्न रहेका एक प्रहरी अधिकारीले भने । अपराध अनुसन्धान कार्यालयका प्रमुख एसएसपी सानुराम भट्टराईले भने यो विषयमा अनुसन्धान भइरहेको बताए । ‘ अनुसन्धान हुँदैछ, केही दिनपछि परिणाम आउनेछ’, एसएसपी भट्टराईले भने । जापान जानका लागि मन्त्री अधिकारीको पासपोर्ट योगराज गौतम भनिने गोपाल गौतमले लिएका थिए । योगराज एमालेका मोरङका स्थानीय कार्यकर्ता हुन । विराटनगरका उनी अहिले भने सिंहदरबारभित्र सरसफाइ गर्ने प्रयोजनार्थ मजदुर वितरण गर्ने गर्छन् ।

मन्त्री अधिकारीलाई जापान जान उनले नै प्रस्ताव गरेका थिए । सोही प्रस्तावपछि  मन्त्री अधिकारीले पासपोर्ट उनलाई दिएका थिए । प्रदेश सरकारको बिनाअनुमति जापान हिँडेका अधिकारी मानव तस्करीमा मुछिएपछि बुधबार नै मन्त्री पदबाट राजीनामा दिएका छन । अध्यागमन स्रोतका अनुसार अधिकारी टोकियो महानगरपालिकामा हुने सांस्कृतिक कार्यक्रममा भाग लिने तयारीमा थिए । तर, टोकियो विमानस्थलस्थित अध्यागमन कार्यालयले डिपोर्ट गर्ने निर्णय गरेपछि अप्ठ्यारोमा परेका थिए ।

१४ कात्तिकमै हङकङ हुँदै जापान पुगेका उनले कार्यक्रममा सहभागी हुन सक्दो प्रयास गरेका थिए । तर, असफल भएपछि उनी पुनः हङकङ फर्किएका थिए । त्यसपछि पनि उनले कार्यक्रममा सहभागी हुने कोसिस गरेको स्रोतको दावी छ । यो विषयमा एमालेको सचिवालय बैठकले उनीमाथि कारवाही गर्ने बताइएको छ ।