उपनिर्वाचनको लागि सशस्त्र र नेपाल प्रहरीमा केन्द्रीय निर्वाचन सुरक्षा समिति गठन

२३ कात्तिक, काठमाडौं । नेपाल प्रहरी र सशस्त्र प्रहरीले मंसिर १६ गते हुने स्थानीय तह उपनिर्वाचनका लागि सुरक्षा तयारी सुरु गरेको छ । प्रहरी प्रधान कार्यालयले प्रहरी उपरीक्षक (एसपी)को कमाण्डमा केन्द्रीय निर्वाचन सुरक्षा समिति गठन गरेको छ ।  प्रहरी उपरीक्षक (एसपी)को कमान्डमा केन्द्रीय निर्वाचन सुरक्षा समिति गठन गरेको छ हो ।   

उक्त समितिले निर्वाचनको सुरक्षाका लागि चाहिने सम्पूर्ण तयारी गर्ने प्रहरी प्रधान कार्यालयले जनाएको छ। सम्बन्धित निकायहरू समन्वय गर्ने, सुरक्षा तयारी गर्ने, निर्वाचनका लागि चाहिने बन्दोबस्तीको सामानहरुको व्यवस्था गर्नेलगायत सबै काम केन्द्रीय निर्वाचन सुरक्षा समितिबाट हुने बताइएको छ ।  

सशस्त्र प्रहरी बलले पनि प्रधान कार्यालयमा सशस्त्र प्रहरी वरिष्ठ उपरीक्षकको नेतृत्वमा केन्द्रीय सुरक्षा समिति गठन गरेको छ । कार्य विभागका एसएसपी दिग्विजयन सुवेदीले सुरक्षा समितिको संयोजन गरेका छन् । प्रदेशमा एसपी, गण भएका जिल्लामा डीएसपी र गुल्म भएका जिल्लामा इन्स्पेक्टरको कमाण्डमा निर्वाचन सुरक्षा समिति गठन गर्ने निर्णय भएको सशस्त्र प्रहरी बलका सहप्रवक्ता शैलेन्द्र थापाले बताए । 

केन्द्रीय निर्वाचन सुरक्षा समिति मार्फत समग्र सुरक्षा चुनौतीको विश्लेषण र सुरक्षा व्यवस्थापन गरिने थापाले जानकारी दिए । निर्वाचन हुने जिल्लामा आसपासका जिल्लाबाट थप जनशक्ति व्यवस्थापन गर्ने गरी सशस्त्र प्रहरीले सुरक्षा योजना तयार गरिरहेको छ ।