मानव बेचबिखनको अनुसन्धानबाट जोगिन पूर्वमन्त्री अधिकारीका चलाखीपूर्ण हर्कत

२४ कात्तिक, विराटनगर । २१ कात्तिकमा आफूलाई इमान्दार मन्त्री भन्दै कोशी प्रदेश सरकारको आन्तरिक मामिला तथा कानुन मन्त्रीबाट राजीनामा दिएका एमाले नेता लिलाबल्लभ अधिकारीले शुक्रबार पार्टीका सबै जिम्मेवारीबाट हटाइ पाउँ भन्दै निवेदन दिएका छन् । पार्टीले निलम्बन गर्न लागेको थाहा पाएपछि उनले त्योभन्दा अगाडि हटाइ पाउँ भन्ने निवेदन दिएका हुन् । 

प्रहरीको अनुसन्धानबाट बच्न उनले यस्तो हर्कत गरेको एमाले नेताहरु नै बताउँछन् ।  सांसद पदमा भने आफू रहिरहने उनको भनाइ छ । जनताले निर्वाचित गरेकाले सांसद पद नत्याग्ने उनको भनाइ छ । मन्त्रिपरिषदबाट स्वीकृत नगरी जापान भ्रमणमा गएको विषय विवादमा परेपछि उनले राजीनामा दिएका थिए । भ्रमणको विषय विवादमा परेपछि नैतिकताका आधारमा राजीनामा दिएको बताउने अधिकारीले पार्टीमा पनि राजनीतिक नैतिकता देखाएर जिम्मेवारीविहिन भएर अनुसन्धानमा सघाउन चाहेको बताएका छन् । तर, अधिकारीले नेकपा एमाले पार्टीको सम्पूर्ण जिम्मेवारीबाट मुक्त गर्ने थाहा पाएर पार्टीमा निवेदन दिएका हुन् । 

यता, मन्त्रीसँग गैरकानुनी रुपमा जापान पुगेर डिपोर्ट भएका युवाहरूको बयान सुरु भएको छ । जिल्ला सरकारी वकिल कार्यालय काठमाडौँमा शुक्रबारदेखि उनीहरूको बयान सुरु भएको काठमाडौँ प्रहरी प्रमुख एसएसपी वसन्त रजौरेले जानकारी दिएका छन् । पक्राउ परेका ६ जनामध्ये केहीको बयान सुरु भएको हो । पक्राउ परेका सबैको बयान सकिएपछि पूर्वमन्त्री अधिकारीलाई पक्राउ गर्ने प्रहरीको तयारी छ । 

उनीहरूको बयानपछि अधिकारीमाथि अनुसन्धान अगाडि बढ्ने प्रहरीकाे भनाइ छ । मोरङ क्षेत्र नम्बर २ (ख) बाट निर्वाचित एमालेका सांसद अधिकारीलाई पार्टीले समेत निलम्बन गर्ने तयारी गरेको थियो । यसअघि उनले जिम्मेवारीबाट हटाउन निवेदन दिए । मानव तस्करीको गम्भीर आरोप लागेपछि अनुसन्धानमा तानिने कुरा प्रष्ट भइसकेको छ । तर, उनी जे नहुनु थियो गल्ती भइगयो, मैले जानेर बुझेर गरेको गल्ती होइन । म पनि पार्टीकै साथीहरूबाट फसे भनिरहेका छन् । 

अधिकारी सांस्कृतिक कार्यक्रमका लागि भनेर जापान हिँडेका थिए । तर उनले जापान जानका लागि मन्त्रिपरिषदबाट स्वीकृति लिएका थिएनन् । उनीसँगै अरु तीनजना युवालाई जापानको टोकियो विमानस्थलबाट डिपोर्ट गरिएको थियो । ती युवालाई रोजगारीका लागि गैरकानुनी रुपमा पठाएर रकम समेत असुलेको पाइएको छ । अधिकारीसँगै जापानको विमानस्थल पुगेका खोटाङका दावा शेर्पा, जनक राई र रसुवाका कन्चन देवकोटालाई त्यहाँको अध्यागमनले डिपोर्ट गरेको थियो ।