मानव तस्करी आरोपमा कोशीका पूर्वमन्त्री लिलाबल्लभ अधिकारी पक्राउ, काठमाडौं ल्याइँदै

२६ कात्तिक, विराटनगर । मानव तस्करी गरेको आरोपमा कोशी प्रदेशका पूर्वमन्त्री लिलाबल्लभ अधिकारी पक्राउ परेका छन् । उनलाई विराटनगरस्थित निवासबाटै पक्राउ गरिएको हो । कोशी प्रदेशका डीआईजी चन्द्रकुबेर खापुङले अधिकारीलाई काठमाडौं पठाउन लागिएको बताए । 

जिल्ला प्रहरी परिसर काठमाडौंको अनुरोधमा उनलाई पक्राउ गरिएको हो । अधिकारीलाई आज एक बजे हवाईजहाजमार्फत् काठमाडौं पठाउने तयारी गरिएको छ । कोशी प्रदेशका तत्कालीन आन्तरिक मामिलामन्त्री अधिकारीलाई मानव तस्करीको आरोप लागेको छ । 

मन्त्रिपरिषदबाट भ्रमण स्वीकृत नगराई उनी जापान गएका थिए । उनीसँगै अन्य ३ जना व्यक्ति पनि जापान गएका थिए । तर जापानको अध्यागमनले उनलाई विमानस्थलबाट फकाइदिएको थियो । उनले आफूलाई फसाइएको भन्दै विभिन्न बहाना बनाउँदै आएका थिए ।