राष्ट्रपति पौडेलद्वारा निरौला र पाण्डेयलाई सर्वोच्चको न्यायाधीशमा नियुक्त

२५ कात्तिक, काठमाडौं । नृपध्वज निरौला र नित्यानन्द पाण्डेय सर्वोच्च अदालतको न्यायाधीश नियुक्त भएका छन् । राष्ट्रपति रामचन्द्र पौडेलले संविधानको धारा १२९ (२) बमोजिम निरौला र पाण्डेयलाई न्यायाधीश नियुक्त गरेका हुन् । 

न्याय परिषद्को सिफारिसमा देहाय बमोजिमका मुख्य न्यायाधीश निरौला र पाण्डेयलाई सर्वोच्च अदालतको न्यायाधीश पदमा नियुक्ति गरेको शीतल निवासले जानकारी दिएको छ । उनीहरुलाई संसदीय सुनुवाइ समितिले सर्वसम्मत अनुमोदन गरेको थियो । 

समितिको शुक्रबार बसेको बैठकले प्रस्तावित न्यायाधीशद्वय निरौला र पाण्डेयको सुनुवाइ गरी सर्वसम्मत अनुमोदन गरेको हो । न्यायपरिषद्ले ११ असोजमा उच्च अदालत पाटनका मुख्य न्यायाधीश निरौला र उच्च अदालत तुलसीपुरका मुख्य न्यायाधीश पाण्डेयलाई सर्वाेच्चको न्यायाधीश पदमा नियुक्तिका लागि सिफारिस गरेको थियो ।