उद्योगमा काटिएको लाइन जोड्ने प्राधिकरणको निर्णय, मन्त्रिपरिषदको निर्देशन कार्यान्वयन हुने

२७ कात्तिक, काठमाडौं । नेपाल विद्युत् प्राधिकरणले उद्योगमा काटिएको लाइन जोडेर मन्त्रिपरिषदको निर्णयको कार्यान्वयन गर्ने निर्णय गरेको छ । मंगलबार बसेको प्राधिकरण सञ्चालक समितिको बोर्ड बैठकले काटिएका उद्योगहरुमा बिजुली जोड्ने निर्णय गरेको हो ।  

प्राधिकरणको बोर्ड बैठकले उद्योगमा काटिएका लाइन जोड्ने निर्णय गरेको ऊर्जा, जलस्रोत तथा सिँचाइ मन्त्रालयका सचिव सुरेश आचार्यले जानकारी दिए । मन्त्रिपरिषद् बैठकले गरेको निर्णय कार्यान्वयन गर्ने बोर्डले निर्णय गरेको उनले बताए । करिब ६ अर्ब रुपैयाँ १५ दिनभित्र विद्युत् प्राधिकरणले उठाउने पनि  बोर्डले निर्णय गरेको छ । 

आइतबार बसेको मन्त्रिपरिषद् बैठकले लाइन काटिएका उद्योगमा बिजुली जोड्ने र महसुल बक्यौता पनि असुल गर्ने निर्णय गरेको थियो । मन्त्रिपरिषद्को उक्त निर्णयसँगै ऊर्जा मन्त्रालयले १५ दिनभित्र टीओडी मिटरको आधारमा बक्यौता रहेका उद्योगमा बिल काट्न र बक्यौता उठाउन निर्देशन दिएको थियो । सरकारले लाल आयोगको प्रतिवेदन पनि सार्वजनिक गरिसकेको छ । 

सोमबार नै उद्योगमा काटिएको लाइन जोड्न मन्त्रिपरिषदले निर्देशन दिएको थियो । तर, सोमबार प्राधिकरणको बोर्ड बैठक बस्न सकेको थिएन । उर्जा मन्त्रालयले भने काटिएको लाइन जोड्न प्राधिकरण सञ्चालक समितिको बोर्ड बैठक आवश्यक नभएको बताएकबो थियो । तर, प्राधिकरणका कार्यकारी प्रमुख कुलमान घिसिङले भने बोर्ड बैठकको निर्णयअनुसार मात्र गरिने बताएका थिए ।