स्याङ्जामा चालु वर्ष सुन्तालमा २० करोडको क्षति

♦ प्रकाश डोटेल

 २७ कार्तिक, स्याङ्जा । स्याङ्जामा चालु वर्ष सुन्तलामा २० करोड रुपैयाँ बराबरको क्षति भएको छ । विभिन्न रोगकिरा र प्राकृतिक प्रकोपका कारण सुन्तलामा २० करोड रुपैयाँ भन्दा बढीको क्षति भएको कृषि ज्ञान केन्द्र स्याङ्जाले जानकारी दिएको छ ।

पतेरोको आक्रमण, फल कुहाउने औंसा किरा र असिनाका कारण सुन्तलामा ठूलो क्षति भएको ज्ञान केन्द्रका बागबानी विकास अधिकृत विकाश विकले बताए । उनका अनुसार साउनदेखि नै पतेरो लगायतका रोग किराका कारण नोक्सानी भोगेका किसानले पछिल्लो ४ कात्तिकमा परेको असिना पानीले झनै क्षति बेहोर्नु परेको छ ।

असिना ठूला नपरेको भएपनि सानो असिना बाक्लो परेको र त्यसले चोट लागेको सुन्तला विस्तारै संक्रमित भएर झरेको कार्यालयका प्रवक्ता समेत रहेका बागबानी विकास अधिकृत विकले जानकारी दिए । पछिल्लो असिना पानीका कारण स्याङजाको पुतलीबजार नगरपालिका वडा नम्बर १०, ११, १२ र १३ का साथै भीरकोट नगरपालिकाको वडा नम्बर ७ मा धेरै क्षति पुगेको छ ।

असिना पानीकै कारण त्यस क्षेत्रका किसानको ५० लाखको हाराहारीमा सुन्तला झरेर नष्ट भएको उनले बताए । स्याङ्जामा यो वर्ष साउनदेखि पतेरो, फल कुहाउने औंसा किरा र असिना पानीले गर्दा फलमा चोट लागेर भएको संक्रमणका कारण समग्रमा २० करोड रूपैयाँभन्दा धेरैको क्षति भएको छ उनले बताए ।

किसानले सुन्तला टिप्ने समय आउन अझै झण्डै एक महिना बाँकी छ । मंसिरको अन्तिमदेखि पुस महिनाभर बारीमा पुगेर व्यवसायीहरूले सुन्तला लैजाने गर्दछन् । पुतलीबजार ११ का किसान चित्रबहादुर थापाले सुन्तला दिन प्रतिदिन झर्दै गएको र अहिले बोटमा भन्दा धेरै भुइँमा झरेको बताए । 

उनले सुन्तला टिप्न नै नपाइने होकी भन्ने चिन्ता लागेको सुनाए । “सुन्तला फूल खेल्दै देखि झर्न थालेको हो ।” उनले भने, “अहिले जति टिप्ने बेला भयो त्यति धेरै झर्दै गएको छ ।” सबै झरेर टिप्न नै नपाइने हो की भन्ने चिन्ताले सताएको थापाले बताए ।

स्याङ्जामा एक हजार पाँच सय हेक्टर उत्पादनशील क्षेत्रमा सुन्तला उत्पादन हुने गरेको कृषि ज्ञान केन्द्रका प्रमुख विनोद हमालले जानकारी दिए । प्रति हेक्टर १६ मेट्रिक टनका दरले उत्पादन हुने गरेको छ । यस वर्ष एक अर्ब ४४ करोड रुपैयाँ बराबरको सुन्तला उत्पादन हुने र एक अर्ब रुपैयाँ बराबरको सुन्तला निर्यात गरिने कार्यालय प्रमुख हमालले जानकारी दिए । 

जिल्लाका किसानहरू सुन्तला खेती तर्फ आकर्षित हुने क्रम बढ्दो छ । विगतका वर्ष र चालु वर्षमा लगाईएको सुन्तलाले आगामी वर्षहरुमा उत्पादान दिदै जाँदा बढ्दै जाने ज्ञान केन्द्रको अनुमान छ । जिल्लामा उत्पादीत सुन्तला निर्यात हुनुका साथै चालु वर्षदेखि सुन्तलाबाट वाईन बनाउने उद्योग समेत संचालनमा आएको छ ।