निर्मला पन्त बलात्कार प्रकरण: तीन जना सहभागी चिन्छु भन्ने को हुन गोर्खाका नवराज अर्याल ?

२८ कात्तिक, काठमाडौं । १३ वर्षकी बालिका निर्मला पन्तको तीन जनाले बलात्कार गरेको र त्यसको प्रत्यक्षदर्शी आफू भएको बताउने नवराज अर्याल नामका एक व्यक्तिको भनाइलाई लिएर यतिबेला सनसनी मच्चिएको छ । पत्रकार ऋषि धमलाको प्राइम शो ‘जनता जान्न चाहन्छन’ को मंगलबारको शोमा धमलाले ति अर्याल थरका व्यक्तिसँग यसै विषयमा अन्तर्वार्ता लिएका छन् ।

उनले धमलासँग निर्मला पन्तको बलात्कारबारे भनेका कुराले नेपाल सरकार र गृह प्रशासनमाथि गम्भीर प्रश्न उठाएको छ । निर्मला पन्त बलात्कार र हत्याकाण्ड नेपालमा भएको एक दर्दनाक हत्याकाण्ड मध्ये एक हो । यसमा कञ्चनपुर भीमदत्त नगरपालिकाकी १३ वर्षिया किशोरी/बालिका निर्मला पन्तको बलात्कार पछि हत्या भएको थियो । वि.सं. २०७५ साउन १० गते कञ्चनपुर जिल्लाको महेन्द्रनगरमा साथीको घरबाट हराएकी किशोरी पन्तको मृत शरीर भोलिपल्ट स्थानीय उखुबारीमा फेला परेको थियो ।

अन्तर्वार्ताका क्रममा अर्यालले बलात्कार हुँदाको बखत आफू त्यही पुगेको र प्रत्यक्ष रुपमा देखेको बताएका छन् । उनले बलात्कारमा तीन जना सहभागी रहेको र तीनै जनालाई आफूले चिन्ने बताएका छन् । उनको भनाइअनुसार बलात्कार गर्ने तीन जनामध्ये एक जना कञ्चनपुरकै र दुई जना बाहिरका हुन् । उनीहरू राजनीतिक दल र उच्च कर्मचारीको संरक्षणमा छन् ।   

स्थानीय बासिन्दाले हत्याकाण्डमा प्रहरीको हात रहेको आशंका गरी छानबिन माग गरेका थिए । प्रहरीको विरुद्धमा भएको प्रदर्शनमा गोली लागि थप एक युवकको समेत मृत्यु भएको थियो । त्यसपछि सरकारले उक्त घटनाको लागि एक विशेष छानबिन समिति गठन गरेको थियो । तर अहिलेसम्म यो घटनाको वास्तविकता बाहिर आउन सकेको छैन । अन्तर्वार्तामा नवराज अर्यालले सो समयमा आफू नेकपा माओवादीका नेतृ तथा तत्कालीन मन्त्री बिना मगरको  सवारी चालक रहेको र मगर घर जाँदा त्यहाँ पुगेर त्यो दृष्य देखेको बताएका छन् ।  

उनले भनेका छन्,‘ मैले अहिलेसम्म १७ जना मन्त्रीको गाडी चलाइसकेको छु । त्यो बेला बिना मगरको गाडी चलाउँथे । मन्त्री मगरलाई घरमा छोडेर बाहिर घुम्न निस्किएको साँझको समयमा त्यो घटना देखिएको हो । निर्मला पन्थ साइकल लिएर उखुबारीको बाटो जाँदै थिइन । त्यो बेला ती तीन जना त्यहीँ  थिए । उनीहरुले समाएर उखुबारीमा भित्र लगे र बलात्कार गरे, ती तीनै जना म चिन्छु ।’

उनले यो घटना भएको देखेको र काठमाडौं फर्किएर सिंहदरबारभित्र बलात्कारीका बाबुसँग भेट भएको बताएका छन । यसक्रममा आफूले बलात्कारीका बाउ यसरी हिँड्दा रहेछन् भनेपछि विभिन्न ठाउँमा आक्रमण भएको बताएका छन् । अर्यालले आफूले यो विषयमा वर्तमान गृहमन्त्री रमेश लेखक, पूर्वगृहमन्त्री रवि लामिछानेदेखि उपप्रधान तथा शहरी विकास मन्त्री प्रकाशमानसिंह भेटेर कुरा गर्न खोज्दा भेट नदिएको बताएका छन् । उच्च प्रहरी अधिकारीले पनि यो विषयमा जानकारी लिन नमानेको उनको भनाइ छ ।

उनले सरकारले घोषित रुपमा आफ्नो सुरक्षाको ग्यारेन्टी लिने भनेको खण्डमा आफूले ति तीन जना बलात्कारीको नाम सार्वजनिक गर्ने बताएका छन् । उनले भनेका छन,‘ अहिले नै यो विषयले गर्दा मेरो ज्यानको सुरक्षा छैन, मलाई कति बेला आक्रमण हुन्छ र मारिन्छ भन्ने थाहा छैन । सरकारले ग्यारेन्टी लिन्छ भने म नाम सार्वजनिक गर्छु ।’ आफू प्रत्यक्षदर्शी भएका कारण धेरै दुःख पाएको उनको भनाइ छ ।