यसअघि स्थगित भएको धितोपत्र बोर्ड अध्यक्षका तीन उम्मेदवारको अन्तर्वार्ता मंसिर ९ मा गरिने

२९ कात्तिक, काठमाडौं । यसअघि स्थगित भएको नेपाल धितोपत्र बोर्ड अध्यक्षका तीन उम्मेदवारको  अन्तर्वार्ता मंसिर ९ गते गरिने भएको छ । असोज १८ गते बोलाइएको अन्तर्वार्ता सिफारिस समितिका संयोजक डा. शिवराज अधिकारी बिरामी भएपछि स्थगित भएको थियो । यो अन्तर्वार्ता अब  मंसिर ९ गते बिहान ८ बजे हुने भएको हो । 

सर्टलिस्टमा परेर पनि अन्तर्वार्ता तथा कार्ययोजना प्रस्तुति हुन नसकेपछि तीन उम्मेदवार कृष्णबहादुर कार्की, चिरञ्जिवी चापागाईं र डा. नवराज अधिकारीलाई बोलाइएको हो । एक सार्वजनिक सूचना जारी गर्दै गठित सिफारिस समितिले तीन उम्मेदवारलाई अन्तर्वार्ता तथा कार्यप्रस्तुतिका लागि बोलाएको छ । 

धितोपत्र बोर्ड २०८० पुस २० पछि कार्यकारी अध्यक्षविहीन छ । यसअघि सर्टलिस्टमा परेका दुई जनाले मात्रै अन्तर्वार्ता तथा कार्ययोजना प्रस्तुत गरेपछि सिफारिस समितिले नाम सिफारिस गर्न सकेको थिएन । नाम सिफारिस हुन नसकेपछि सरकारले नयाँ प्रक्रिया सुरु गर्न समितिका तिनै सदस्य रहनेगरी अर्को सिफारिस समिति बनाएको थियो ।