रविको बयान : खातामा आएको २ करोड झिकेर चलाएको हुँ, कसले पठायो थाहा भएन !

२९ कात्तिक, काठमाडौं । सहकारी ठगी प्रकरणको अनुसन्धानमा रहेका राष्ट्रिय स्वतन्त्र पार्टी (रास्वपा) का सभापति एवं पूर्वगृहमन्त्री रवि लामिछानेले आजको बयानमा २ करोड रकम आफ्नो खातामा आएको स्वीकार गरेका छन् । उनले आफ्नो खातामा आएको २ करोड रकम आफूले झिकेर चलाएको तर, सो पैसा कसले र किन पठाएको हो भन्ने कुरा जानकारी नभएको बताएका छन् । 

उनको बयानमा संलग्न एक अधिकारीलाई उधृत गर्दै स्रोतले भन्यो, ‘रविले बयानका क्रममा १ करोड ९६ लाख रकम आफ्नो खातामा आएको बताए । उनले १ करोड ९६ लाख रकम झिकेर पनि चलाएको तर कसले पठाएको भन्ने थाहा नभएको बताए । यसबाट उनले सहकारीको रकम ठगीमा संलग्न भएको भन्ने प्रष्ट भयो, स्राेतले भन्याे ।’ अनुसन्धान र बयानका क्रममा प्रहरीले सम्पति शुद्धीकरण अन्तर्गतको मुद्दामा नयाँ विषय पत्ता लगाएको पनि बताइएको छ । तर, त्यो विषयलाई प्रहरीले गोप्य नै राखेको छ । 

उनले नेपालमा बसेर छोटो समयमा नै विदेशमा धेरै पैसा पठाएको तथ्य पनि प्रहरीले पत्ता लगाएको छ । लामिछानेको रूपन्देहीमा तीन दिनको बयान सकिएको छ । पहिलो दिन मौखिक प्रश्नको जवाफ र दोस्रो र तेस्रो दिन ७० भन्दा बढी लिखित प्रश्नको जवाफमा उनले सहकारी ठगीमा संलग्नता ठाडै अस्वीकार गरेका छन् । आजको बयानमा उनले १ करोड ९६ लाख भने आफूले चलाएको बताएका हुन् । 

अनुसन्धानमा संलग्न रहेका एक अधिकृतका अनुसार उनले सोधिएका सबै प्रश्नमा आफू कतै पनि सहभागी नभएको बताउँदै आएका थिए । हरेक प्रश्नको सहजै जवाफ दिएका उनी २ करोडमा भने फुत्किएका थिए । उनलाई आजै पोखरा पठाइने भएको छ । २६ दिनदेखि सहकारी ठगी र संगठित अपराध कसुरमा अनुसन्धानका लागि कास्की प्रहरी हिरासतमा रहेका उनलाई मंगलबार रूपन्देही ल्याइएको थियो ।

यसैबीच कास्की प्रहरीले रवि लामिछानेसहित एकाघरका नातेदारको बैंक खाता र सम्पति रोक्का गर्न बैंक र सम्बन्धित मालपोत कार्यालयलाई पत्राचार पनि गरेको छ । उनको रुपन्देहीमा बयान सकिएर कास्की ल्याएपछि प्रहरीले अन्य विषयमा थप मुद्दा चलाउने तयारी गरिरहेको छ । सम्पति शुद्धीकरणको मुद्दा पनि सँगसँगै अगाडि बढाउन लागिएको छ ।