नेपालले आज ४० मेगावाट विद्युत् बंगलादेश निर्यात गर्दै

३० कात्तिक, काठमाडौं । नेपाल विद्युत प्राधिकरणले आज शुक्रबार ४० मेगावाट बिजुली बंगलादेश निर्यात गर्ने भएको छ । गएको असोज १७ गतेको सम्झौतापछि नेपाल विद्युत् प्राधिकरणले बंगलादेशमा विद्युत् बिक्रीका निम्ति पठाएका दुई आयोजनामा भारतले स्वीकृति दिएको छ । यसको उद्घाटन भर्चुअल रूपमा  संयुक्त रूपमा तीन देशका ऊर्जामन्त्रीले गर्नेछन् । 

त्यसपछि आज राति १२ बजेसम्म नेपालबाट बङ्गलादेशमा ४० मेगावाट विद्युत् गएर नेपाल–बङ्गलादेशबिच विद्युत् व्यापारको औपचारिक सुरुवात हुनेछ । नेपालले जुन १५ देखि नोभेम्बर १५ सम्म ४० मेगावाट बिजुली बंगलादेशलाई बिक्री गर्न पाउने सम्झौता छ । अन्तिम समयमा स्वीकृति पाएसँगै आज दिउँसो बिजुली पठाउन लागिएको नेपाल विद्युत् प्राधिकरणले जनाएको छ । 

प्राधिकरणले बंगलादेश निर्यातका निम्ति चिलिमे र त्रिशूली जलविद्युत आयोजनाको नाम प्रस्ताव गरेको थियो । यी दुवै यसअघि भारतीय बजारमा बिक्री भइरहेका आयोजना समेत हुन् । भारतले स्वीकृत नदिएका कारण विद्युत निर्यातको विषय अलमलमा परेको थियो ।