हनी ट्रयापमा जोडिएका एसपी थापाको सीआईबीमा बयान, मुद्दा यसै साता बुझाइने

३० कात्तिक, काठमाडौं । हनी ट्र्यापमा जोडिएका एसपी कमल थापालाई केन्द्रीय अनुसन्धान व्युरोले बयान लिएको छ । व्यापारीलाई हनी ट्रयापिङमा फसाएर प्रहरीकै मिलेमतोमा ३० लाख असुलिएको घटनाको अनुसन्धानका क्रममा एसपी थापालाई बयान लिएको हो ।  

एसपी थापा योजनाकार समूहका केही व्यक्तिसँग नजिक देखिएपछि प्रहरीले कारवाहीको लागि बयान लिएको हो । यतिबेला उनलाई जोगाउने प्रयास भइरहेको छ । सरकारी वकिल कार्यालयको निर्देशनमा प्रहरीले उनको बयान कागज गरेको हो । ‘उनले आरोप अस्वीकार गरेका छन् इन्स्पेक्टर बिनु शाही बारे केही  थाह नभएको जवाफ दिएका छन्’, सीआईबी स्रोतले भन्यो

गत ७ असोजमा ललितपुरको भैंसेपाटी प्रभागमा मोरङका एक व्यापारीलाई थुनामा राखी बलात्कार मुद्दामा फसाइदिने भन्दै ३० लाख असुलिएको थियो । जसमा प्रभागकी तत्कालीन प्रमुख इन्स्पेक्टर बिनुकुमारी शाहीको समेत मिलेमतो थियो । निलम्बनमा परेकी उनी डेढ महिनादेखि फरार रहेकी छिन् । उनको पक्राउमा प्रहरीले  चासो दिएको छैन । उनका चालक रहेका सहायक हवल्दार महेन्द्र हमाल र गिरोहका ताज इस्लाम, सुष्मा विक र भिमादेवी थापालाई प्रहरीले पक्राउ गरी संगठित अपराध र आपराधिक लाभ मुद्दामा अनुसन्धान गरिरहेको छ ।

इन्स्पेक्टर शाही र इटहरीका दर्शन पोखरेलविरुद्ध समेत पक्राउ पुर्जी जारी भएपनि फरार नै छन् । एसपी थापाले नै ताज इस्लामको समूहलाई इन्स्पेक्टर शाहीलाई भेटाएको देखिएपछि अहिले थापामाथि अनुसन्धान शुरु भएको हो । पैसा लेनदेनपछि पनि इस्लाम र एसपी थापाबीच डेढ घन्टा कुराकानी भएको थियो । जसकारण उनको समेत यसमा योजना देखिएको छ ।

साथै गत जेठमा ठेकदार विदुर शर्मालाई दरबारमार्ग वृत्तमा त्यसैगरी फसाइएको घटनामा समेत उनको मिलेमतो देखिएको प्रहरी स्रोत बताउँछ । एसपी थापालाई प्रहरी प्रधान कार्यालयमा राखेर अनुसन्धान भइरहेको छ । प्रहरीले यसै साता मुद्दा अदालतमा बुझाउने प्रयास गरेको छ । सीआइबीले ललितपुर प्रहरी परिसरमा कार्यरत डीएसपी नरहरि अधिकारीमाथि पनि छानवीन गरिरहेको छ । अधिकारीले  भने निलम्बित इन्स्पेक्टर शाहीलाई छोइछिटो गरेको आरोप छ ।