गौशाला क्षेत्रका अतिक्रमण संरचनामा महानगरले चलायो डोजर

३० कात्तिक, काठमाडौं । काठमाडौँ महानगरपालिकाले गौशाला क्षेत्रका अतिक्रमण गरेर बनाइएका संरचनामा डोजर लगाएर हटाएको छ । चक्रपथ सडक सीमाभित्र अतिक्रमण गरेर बनाइएका संरचनामा शुक्रबार महानगरपालिकाले डोजर चलाएको हो । 

चक्रपथ सडक सीमा २५ मिटरभित्र बनाइएका पक्की, कच्ची संरचना हटाउने कार्यअन्तर्गत शुक्रबार यस क्षेत्रमा डोजर चलाइएको महानगरले जनाएको छ । अतिक्रमण गरेर सडक सीमामा बनेका घरहरूलाई स्थानीय सरकारको अग्रसरतामा हटाउन लागिएको हो । 

गौशालामा महानगरको डोजर चलिरहँदा स्थानीयले अवरोध गर्न खोजेका थिए । अभियन्ता सुमन सायमी डोजर अगाडि सुतेपछि प्रहरीले उठाएर गौशाला प्रहरी वृतमा लगेको छ । नगरप्रहरीले चक्रपथ सडक सीमा मिचिएको भन्दै घरहरुमा डोजर चलाइरहेको छ । डोजर आउनासाथ स्थानीयवासीहरुले विरोध गरे पनि नगर प्रहरीले काम भने रोकेको छैन् । 

घरमा भत्काउने काम जारी रहँदा अचानक सायमी डोजर अगाडि आएर सुतेका थिए । सुरुमा थोरै भत्काउने भनिए पनि पछि सिंगै घरमा डोजर चलाइएको थियो । स्थानीयको प्रतिकारका बाबजुत पनि महानगरको टोलीले भत्काउने काम अगाडी बढाएको थियो ।