एसएसबी प्रमुखले सीमा सुरक्षाबारे बैठकमा प्रस्ताव गरिएका विषय गृहमन्त्रीलाई गराए जानकारी

२ मंसिर, काठमाडौं । काठमाडौंमा जारी नेपाल–भारत सीमा सुरक्षासम्बन्धी बैठकमा उठाइएका विषयमा भारतीय सशस्त्र सीमा सुरक्षा बल (एसएसबी) का महानिर्देशक अमृतमोहन प्रसाद र गृहमन्त्री रमेश लेखकबीच छलफल भएको छ । दुई देशका अधिकारीहरूको उच्चस्तरीय बैठकमा भारतले तेस्रो मुलुकका नागरिकको अवैध प्रवेश रोक्न प्रस्ताव गरेको छ । 

सोमबारसम्म सञ्चालन हुने बैठकमा सीमापार अपराध नियन्त्रण तथा तेस्रो मुलुकका नागरिकको अवैध प्रवेश निषेध गर्ने विषयमा साझा निष्कर्ष निकाल्ने विषयमा छलफल चलिरहेको छ । आज नेपालले पेस गरेको सीमा सुरक्षासम्बन्धी संयुक्त एजेण्डामा छलफल भइरहेको समयमा एसएसबी प्रमुख अमृतमोहनले गृहमन्त्री लेखकलाई भेटेर रानकारी गराएका हुन् । 

सीमा क्षेत्रमा हुने अपराध नियन्त्रण, त्यसनिम्ति सूचना आदानप्रदान, राजस्व चुहावट नियन्त्रण, मानव बेचबिखन र तेस्रो मुलुकका नागरिकको अवैध प्रवेश नियन्त्रणलगायत विषय नेपालका तर्फबाट प्रस्ताव प्रस्तुत भएको छ भने भारतले भारत हुँदै तेस्रो मुलुकका नागरिक अवैध रुपमा नेपाल प्रवेश गर्ने कुरालाई रोक्नुपर्ने बताएको छ । यीनै विषयमा गृहमन्त्री रमेश लेखकसँग एसएसबीका महानिर्देशक अमृतमोहनसहितको टोलीले भेटवार्ता गरी छलफल गरेको हो । 
      
सिंहदरबारस्थित गृहमन्त्रालयमा भएको भेटवार्तामा सशस्त्र प्रहरी बल नेपाल र भारतीय सीमा सुरक्षा बल (एसएसबी)का बीच दुई देशको सीमा सुरक्षाका क्षेत्रमा सौहार्दपूर्ण वातावरणमा भइरहेको कामका विषयमा छलफल भएको थियो । भेटवार्ताका क्रममा गृहमन्त्री लेखकले सीमा क्षेत्रमा हुने लागुऔषधको अवैध कारोबार र ओसारपसार तथा मानव बेचबिखन नियन्त्रणका साथै आपराधिक गतिविधि नियन्त्रणमा सहयोग र सहकार्य गर्न जोड दिएका िथए । 

जनताले कष्ट नपाउनेगरी सौहार्दपूर्ण वातावरणमा शान्तिसुरक्षा र अपराध नियन्त्रणतर्फ दुवैतर्पmको ध्यान जानुपर्नेमा जोड दिँदै गृहमन्त्री लेखकले नेपाल–भारत सीमा नाकामा ओहोरदोहोर गर्ने नागरिकहरुलाई मर्यादित व्यवहार गर्न सम्बद्ध अधिकारीहरूलाई निर्देशन दिए । नेपाल–भारतबीच सदियाँै पुरानो सम्बन्ध रहिआएको छ । सीमासुरक्षा बलका काम कारबाहीले दुई देशबीचको सम्बन्ध थप बलियो हुनेमा विश्वस्त छु, सहयोग र सहकार्य गरी सीमा क्षेत्रमा हुने अपराध नियन्त्रणसहित सीमा आवतजावतका क्रममा सम्मानजनक व्यवहार गरी दुवै देशका जनताको विश्वास जितौँ, गृहमन्त्रीले छलफलमा भने । 
 
सो भेटवार्ताका अवसरमा गृहसचिव गोकर्णमणि दुवाडी, सशस्त्र प्रहरी बल नेपालका प्रहरी महानिरीक्षक राजु अर्याल र भारतीय एसएसबीका महानिर्देशक अमृत मोहनप्रसादससहित उच्च अधिकारीको सहभागिता थियो । सशस्त्र प्रहरी बल नेपाल र भारतीय सशस्त्र सीमा बलबीच हरेक वर्ष हुने समन्वय बैठकमा भाग लिन महानिर्देशक प्रसादको नेतृत्वमा एसएसबीको उच्चस्तरीय टोली काठमाडौँ आएको हो ।