खादा माला लगाएर मनोनयन दर्ता गर्न निस्किएका माओवादीका उम्मेदवार महर्जन बाटामै खिस्स

२ मंसिर, काठमाडौं । घरबाट उम्मेदवारी दर्ता गराउन निस्किएका नेकपा माओवादीका एक जना उम्मेदवार बाटैबाट खिस्स हुनुपर्यो । कीर्तिपुर नगरपालिका वडा नं १ को अध्यक्ष पदमा उम्मेदवारी दिन तामझामसहित निस्किएका अष्टमान महर्जन निर्वाचन अधिकृतको कार्यालय पुग्दा अर्कै उम्मेदवारलाई सघाउनुपर्ने परिस्थिति सिर्जना भयो ।  

उनी माओवादीबाट उम्मेदवारी गराउन निर्वाचन अधिकृतको कार्यालय जाँदै थिए । बिहानसम्म माओवादीले कीर्तिपुर नगरपालिका वडा नं १ को उपनिर्वाचनका लागि अष्टमान महर्जनलाई उम्मेदवार बनाउने निर्णय गरेको थियो । त्यसैले उनी आइतबार कीर्तिपुर अस्पताल नजिक स्थापित निर्वाचन अधिकृतको कार्यालयमा टीका माला लगाएर उम्मेदवारी दर्ता गर्न निस्किए । 

उम्मेदवारी दर्ता गर्न आउँदै गर्दा बाटोमै उनलाई गठबन्धन गरेर १ नम्बर वडामा जसपालाई सघाउने कुरा भयो नजानु भन्ने खबर आयो । त्यसपछि महर्जन एकछिन घोत्लिए र आफू बागी नबन्ने भन्दै जसपाका सरल गोपाल महर्जनलाई सघाउने निर्णय लिए । पार्टीबाट गठबन्धन गर्ने निर्णय भएको छ । पार्टीको निर्णय मान्छु, बागी बन्दिनँ भनेर समर्थन गरे, उनले भने ।
 
माओवादीले जसपाका सरल महर्जनलाई सघाउने भएको छ । माओवादीको र्यालीमा सरल पनि मिसिएका थिए । अष्टमानले सरललाई शुभकामना दिए र सँगै फोटो पनि खिचाए । उनले पत्रकारसँग कुरा गर्दै आफू पार्टीको निर्णय मान्ने बताए । पार्टीले जसपासँग गठबन्धन गर्ने निर्णय गरेको छ, म बागी उम्मेदवारी दिन्न, उनले भने ।