भ्रष्टाचार मुद्दामा अदालतबाट सफाइ पाएको १८ दिनपछि योजना आयोगमा हाजिर भए बैकुण्ठ अर्याल

२ मंसिर, काठमाडौं । स्टिकर छपाइ खरिद प्रकरणको भ्रष्टाचार मुद्दाबाट सफाइ पाएका तत्कालीन मुख्यसचिव डा. बैकुण्ठ अर्याल आइतबारदेखि कार्यालय हाजिर भएका छन् । उनले सरकारले योजना आयोगमा सिर्जना गरेको पदमा नै हाजिर गरेका छन् । आइतवार अर्यालले कार्यालय पुगेर हाजिर गरेका हुन् । यसअघि प्रधानमन्त्री कार्यालयले उनलाई रमाना पत्र दिएको थियो । 

सञ्चार सचिव रहँदाको निर्णय प्रक्रियामा संलग्न रहेको आरोपमा अख्तियार दुरुपयोग अनुसन्धान आयोगले अर्यालसहित ११ जना विरुद्ध गत ९ असारमा भ्रष्टाचार मुद्दा दायर गरेको थियो । मुद्दा दायरसँगै अर्याल स्वतः निलम्बनमा परेका थिए । यही १४ कात्तिकमा विशेष अदालतले अर्याल उपरको आरोप अस्वीकार गर्दै सफाइ दिने फैसला गरेको थियो । सफाइको फैसलापछि अर्यालको निलम्बन फुकुवा भएको थियो । 

अदालतबाट सफाइ पाएर निलम्बन फुकुवा भएको लामो समयपछि अर्यालले आयोग पुगेर हाजिर गरेका हुन् । मुद्दा दायरसँगै मुख्यसचिव पद स्वतः निलम्बनमा परेका अर्याललाई सरकारले राष्ट्रिय योजना आयोगमा विशेष अधिकृत राजपत्रांकित विशिष्ट श्रेणी, मुख्यसचिव सरह पद सिर्जना गरी सरुवा गरेको थियो । अर्याललाई आयोगमा स्थानान्तरण गरेपछि रिक्त मुख्यसचिव पदमा सरकारले एकनारायण अर्याललाई ल्याएको हो । 

भ्रष्टाचार मुद्दामा सफाइ पाएपछि प्रधानमन्त्री तथा मन्त्रिपरिषद् कार्यालयले दरबन्दी कायम रहेको ठाउँमा अर्यालको रमाना पठाइदिएको थियो । तर, अर्याल लामो समय आयोग गएनन् । अदालतबाट सफाइको निर्णय भएको १८ दिनपछि उनी आयोगमा हाजिर भएका हुन् ।