कीर्तिपुरकी कार्यवाहक मेयर शाक्यमाथि हातपात, कार्यालयमा तोडफोड

२ मंसिर, काठमाडौं । कीर्तिपुर नगरपालिकाकी कार्यवाहक मेयर शुभलक्ष्मी शाक्यमाथि हातपात भएको छ । किर्तिपुर नगरपालिका वडा नं ३ का वडाध्यक्ष सुवीन्द्र महर्जनले कार्यवाहक मेयरमाथि हातपात गरेको आरोप लगाइएको छ । उनले कार्यवाहक मेयरको कार्यकक्षमा तोडफोड गरेका छन् । 

नगरपालिकाका सम्पर्क शाखा अधिकृत सुजीन्द्र महजर्नले वडाध्यक्षले हातपात र तोडफोड गरेको जानकारी दिएका छन् । राजनीतिक कारण विवाद सिर्जना भएको थियो । वडाध्यक्ष मर्हजनले दिउँसो कार्यालय पुगेर कार्यवाहक मेयरमाथि हातपात गरेको बताइए पनि  उनले भने आफूले हातपात नगरेको दाबी गरेका छन् । 

वडाध्यक्षहरूलाई समय नदिएको र कार्ययोजनामा छलफल गर्न बोलाएर कुराएको कारण विवाद भएको थियो । यही विवादमा महर्जन र शाक्यबीच मनमुटाव थियो । वडाध्यक्षहरूलाई बोलाएर धेरै कुराएको विषय लिएर महर्जन कार्यवाहक मेयर समक्ष गएका थिए । मेयर राजकुमार नकर्मीको निधन भएपछि शुभलक्ष्मीले कार्यवाहक मेयरको जिम्मेवारी सम्हाल्दै आएकी छिन् ।

कार्यवाहक मेयर शाक्यले वडाध्यक्ष महर्जनले प्रमुख प्रशासकीय अधिकृतको समय नपाएपछि आफ्नो कार्यकक्षमा आएर तोडफोड गरेको बताएकी छन् । प्रमुख प्रशासकीय अधिकृतले विभागीय प्रमुखहरुको बैठक राख्नुभएको थियो ।  त्यही बेला ३ नम्बर वडाध्यक्षले वडाको विभिन्न मागहरुले लिएर नगरपालिका आउनुभएको थियो । त्यो बेला समय नपाएपछि उहाँ रिसाएर मेरो सचिवालयमा पस्नुभयो । मसहित अरु जनप्रतिनिधि सँगै थियौं । उहाँले प्रमुख प्रशासकीय अधिकृतले समय नदिएको भनेर रिसाउँदै टेबल फुटाउनु भयो, उनले भनिन् ।