मन्त्रिपरिषदको ढिलो निर्णय, कार्यालय पुगेर कर्मचारीले हाजिर गरेपछि थाहा पाए सार्वजनिक बिदा

३ मंसिर, काठमाडौं । सार्वजनिक बिदाबारे मन्त्रिपरिषदले ढिला निर्णय गर्दा देशभरका सेवाग्राही एवं कर्मचारीहरू कार्यालय पुगेर फर्किनु परको छ । पूर्वसभामुख दमननाथ ढुंगानाको निधनको शोकमा सरकारले सोमबार सार्वजनिक बिदा दिने निर्णय गर्दा सबै कर्मचारी कार्यालय पुगिसकेका थिए । ढिलो गरी निर्णय हुँदा कर्मचारी र सेवाग्राहीले सास्ती भोगे ।

सोमबार बिहान बसेको मन्त्रिपरिषद्को बैठकले सार्वजनिक बिदा दिने निर्णय गरेको हो । ढुंगानाको आइतबार दिउँसो निधन भएको थियो । सरकारले ढिलो गरी निर्णय गर्दा कर्मचारी र सर्वसाधरणले दुःख पाएका छन् । बिहान ९.३० बजे कार्यालय पुगेका कर्मचारीले १० बजेपछि मात्र सार्वजनिक विदाको सूचना पाए । सरकारको निर्णय सार्वजनिक हुँदै गर्दा प्रायः कर्मचारी तथा सेवाग्राहीहरु कार्यालय पुगिसकेका थिए । 

राहदानी विभाग, यातायात कार्यालय, जिल्ला प्रशासन कार्यालयहरूमा नौ बजेदेखि नै सेवाग्राहीहरुको भीड लाग्ने गर्दछ । तर, ९ बजेपछि मात्र सरकारले सार्वजनिक बिदाको निर्णय गरेको थियो । त्यो निर्णय सबैतिर पुग्दा १० बजेभन्दा बढी भइसकेको थियो । । जसकारण कतिपय कर्मचारी बाटैबाट त कतिपय कार्यालय पुगेपछि फर्किएका छन् ।

सरकारका प्रवक्ता एवं सूचना तथा सञ्चार प्रविधिमन्त्री पृथ्वी सुब्बा गुरुङले भने हतार नगरी एक घण्टा अगाडि नै सार्वजनिक बिदा दिने निर्णय गरेको बताए । सरकारले सही दिन र सही समयमा निर्णय गरेको उनको भनाई छ ।