चेक बाउन्स आरोपमा काभ्रेका सत्यमान लामा पक्राउ, अदालतबाट २ वर्षको कैद सजाय भएको थियो

३ मंसिर, काठमाडौं । चेक बाउन्स मुद्दामा कैदसहित जरिवाना फैसला सुनाइएका गुन्डा नाइके सत्यमान लामा पक्राउ परेका छन् । उनलाई आइतबार साँझ पक्राउ गरिएको प्रहरीले जानकारी दिएको छ । सुन तस्करी नेटवर्कमा रहेको भनिएका लामा चेक बाउन्स मुद्दाका आरोपित हुन् । 

काभ्रेको तेमाल घर भई काठमाडौं महानगरपालिका–४ बस्दै आएका लामालाई पक्राउ गरिएको जिल्ला प्रहरी परिसर काठमाडौंका प्रवक्ता प्रहरी उपरीक्षक नवराज अधिकारीले जानकारी दिएका छन् । उनीमाथि अनुसन्धान सुरु भएको प्रहरीको भनाइ छ । 

पक्राउ परेका सत्यमान सुन तस्करी प्रकरणमा जोडिएका दावा लामाका सहयोगी भएको बताइएको छ ।  उनीमाथि बुद्ध चित्त र रक्त चन्दन व्यापारको पनि अभियोग छ । लामालाई जिल्ला अदालत काठमाडौंले २०८० चैत २७ गते २ वर्ष कैद र ३० लाख बिगो र ३० लाख जरिवाना सजाय हुने फैसला गरेको थियो । त्यस यता उनी फरार जस्तै थिए ।