कास्की र रुपन्देहीपछि काठमाडौं फर्कियो सहकारीको अनुसन्धानः रम्तेलको बयान सुरु, रवि र छवि पनि ल्याइँदै

३ मंसिर, काठमाडौं । सरकारी ठगी प्रकरणको अनुसन्धानलाई प्रहरीले काठमाडौं केन्द्रित गर्न लागेको छ । रुपन्देही र कास्कीमा रहेका सहकारीको रकम अपचलन बारे अहिले अनुसन्धान जारी छ । सहकारी ठगीको अनुसन्धानका लागि पक्राउ परेकाहरूको बयान चलिरहे पनि कास्की हिरासतमा रहेका रवि लामिछानेको काठमाडौंबाट पनि पक्राउ पुर्जी जारी भएको छ । 

काठमाडौंको कालिमाटीस्थित स्वर्णलक्ष्मी बहुउद्देश्यीय सहकारी संस्थाको रकम अपचलन बारे अनुसन्धान गर्न प्रहरीले कास्कीमा थुनामा रहेका कुमार रम्तेललाई काठमाडौं ल्याएर बयान लिन सुरु गरेको छ । सूर्यदर्शन सहकारीको कोषाध्यक्ष रम्तेल बचतकर्ताको रकम अपचलनमा संलग्न आरोपमा जिल्ला कारागार कास्कीमा थुनामा थिए । उनलाई स्वर्णलक्ष्मीको रकम अपचलन बारे अनुसन्धान गर्न काठमाडौँ ल्याएको ल्याइएको हो । 

कास्की हिरासतमा रहेका राष्ट्रिय स्वतन्त्र पार्टी (रास्वपा) का सभापति एवं पूर्वगृहमन्त्री रवि लामिछानेलाई पनि यही प्रकरणमा काठमाडौं ल्याउन लागिएको छ । स्वर्णलक्ष्मी बहुउद्देश्यीय सहकारी संस्थाबाट गोरखा मिडिया नेटवर्कमा १ करोड ८२ लाख अवैध तरिकाले लगेर अपचलन गरेको भेटिएको छ । ६४५ जना बचतकर्ताले प्रहरीमा जाहेरी दिएका छन् । यसमा रवि लामिछाने पनि परेका छन् । 

रम्तेल जीबी राईको आर्थिक हेर्ने मुख्य व्यक्ति हुन । उनी गोरखा मिडिया नेटवर्कमा पनि शेयर होल्डर थिए । कार्तिक २८ मा काठमाडौँ ल्याएर प्रहरीले उनीसँग बयान लिइरहेको छ । स्वर्णलक्ष्मीको रकम अपचलन गरेको आरोपमा लामिछाने र पूर्वडीआईजी छविलाल जोशीविरुद्ध पनि पक्राउ पुर्जी जारी भएको छ । आइतबार काठमाडौँ जिल्ला अदालतका न्यायाधीश शिशिरराज ढकालले दुवैलाई थुनामा राखेर अनुसन्धान गर्न जिल्ला प्रहरी परिसर काठमाडौँलाई अनुमति दिएका हुन् ।

लामिछाने र जोशी अहिले जिल्ला प्रहरी कार्यालय कास्कीको हिरासतमा छन् । स्वर्णलक्ष्मीको रकम अपचलन गरेको आरोपमा काठमाडौँ प्रहरीले कमल लामा र सुनिता नेवालाई पक्राउ गरेर अनुसन्धान गरिरहेको छ । पूर्वगृहमन्त्री समेत रहेका लामिछानेसहित करिब दुई दर्जनविरुद्ध पक्राउ पुर्जी आएको छ । सहकारी ठगी मुद्दामा लामिछानेसहित २२ जनाविरुद्ध पक्राउ पुर्जी जारी भएको छ ।

सहकारी ठगी, संगठित अपराध र सम्पत्ति शुद्धीकरणसम्बन्धी कसुरमा कास्की प्रहरीको हिरासतमा रहेका लामिछानेलाई रुपन्देही लगेर बयान लिइएको थियो । पोखराको सूर्यदर्शनसँगै बुटवलस्थित सुप्रिम सहकारीको रकम अपचलनमा समेत अनुसन्धान गर्नुपर्ने देखिएपछि उनलाई बुटवल लगेर बयान सकिएसँगै कास्की फर्काइएको थियो  । अब उनलाई काठमाडौं ल्याउने तयारी गरिएको छ ।