जग्गादान सम्बन्धी रिटको पेशी न्यायाधीश मल्ल र मुसलमान इजलासको अन्तिम सूचीमा

 ४ मंसिर, काठमाडौं । अघिल्लो पटक न्यायाधीश नहकुल सुवेदीको इजलासमा परेपछि हेर्न नमिल्ने भन्दै पेशी हटाइएको जग्गादान सम्बन्धी रिट आज न्यायधीशहरु सपना प्रधान मल्ल र अब्दुल अजिज मुसलमानको संयुक्त इजलासमा परेको छ ।

नेकपा एमालेको पार्टी कार्यालय निर्माणका लागि व्यवसायी मीनबहादुर गुरुङबाट दानमा पाएको जग्गासम्बन्धी विवादमा दायर भएको रिटमाथि आज सुनुवाइ हुँदैछ ।  यो रिट १७ भन्दा पछिल्लो नम्बरमा परेको छ ।  
 
यसअघि आइतबार उक्त रिट हेर्न नभ्याउने हुँदै स्थगित भएपछि आज मंगलवार पुन: नयाँ इजलासमा पेसी तोकिएको हो । अधिवक्ता ज्ञानबहादुर बस्नेतले सो रिट दायर गरेका थिए । उक्त रिटमा पहिलो सुनुवाई गर्दै सर्वोच्चले  कात्तिक १२ गते अल्पकालीन अन्तरिम आदेश जारी गरेको थियो ।

न्यायाधीश सुनिलकुमार पोखरेलको इजलासले भाटभटेनी डिपार्टमेन्ट स्टोरका मालिक गुरुङसँग जग्गा तत्काल लिने कार्य रोक लगाएको थियो ।