राष्ट्र बैंकको दावीः औसत मूल्यवृद्धि ४.८२ प्रतिशत, तलब र ज्याला ३.३६ प्रतिशतले बढ्यो

४ मंसिर, काठमाडौं । गत असोज महिनामा वार्षिक विन्दुगत उपभोक्ता मूल्यवृद्धिदर (मुद्रास्फीति) ४.८२ प्रतिशत छ । गत वर्षको सोही महिनामा यस्तो मूल्यवृद्धिदर ७.५० प्रतिशत थियो । नेपाल राष्ट्र बैंकको रिपोर्टले महँगी घटेको देखाएको छ । असोज महिनामा उपभोक्ता मुद्रास्फिति ४.८२ प्रतिशत रहेको जनाएको छ । अघिल्लो वर्षको सोही अवधिमा मुद्रास्फिीति दर ७.५० प्रतिशत थियो ।

असोजमा खाद्य तथा पेय पदार्थको मुद्रास्फीति ७.१८ र गैर–खाद्य तथा सेवा समूह मुद्रास्फीति ३.४९ प्रतिशत रहेको केन्द्रीय बैंकले जनाएको छ । यस्तै, बैंकले मंगलबार जारी गरेको तथ्यांकमा २०८१÷०८२ को पहिलो तीन महिनामा तलब तथा ज्याला ३.३६ प्रतिशतले बढेको देखाउँछ । अघिल्लो वर्षको सोही अवधिमा ५.६५ प्रतिशत थियो ।  

उक्त अवधिमा खाद्य तथा पेय पदार्थ समूहको मूल्यवृद्धि ७.१८ प्रतिशत र गैर–खाद्य तथा सेवा समूहको ३.४९ प्रतिशत छ । गत वर्ष सोही मूल्यवृद्धि क्रमशः ८.४८ प्रतिशत र ६.८५ प्रतिशतले वृद्धि भएको थियो ।

गत असोजमा महिनामा खाद्य तथा पेय पदार्थ समूहअन्तर्गत तरकारी उप–समूहको वार्षिक बिन्दुगत उपभोक्ता मूल्य सूचकांक २५.१५ प्रतिशत, दाल तथा गेडागुडीको १० प्रतिशत, खाद्य तथा खाद्यजन्य पदार्थको ९.५७ प्रतिशत र घ्यू तथा तेलको ४.९८ प्रतिशतले बढेको छ ।

तर, माछा तथा मासु उप–समूहको वार्षिक बिन्दुगत उपभोक्ता मूल्य सूचकांक १.१८, मरमसलाको ०.७९ र चिनी तथा चिनीजन्य पदार्थको ०.७८ प्रतिशतले घटेको छ ।
 
यस्तै, गैर–खाद्य तथा सेवा समूहअन्तर्गत विविध वस्तु तथा सेवा उप–समूहको वार्षिक बिन्दुगत उपभोक्ता मूल्य सूचकांक १०.४९ प्रतिशत, मदिराजन्य पेय पदार्थको ६.३२ प्रतिशत, कपडाजन्य तथा जुत्ताचप्पलको ६.१२ प्रतिशत र घरायसी उपकरणको ४.८८ प्रतिशतले बढेको राष्ट्र बैंकको प्रतिवेदनले देखाएको छ ।