एसपी थापालाई बाहिर राखेर भैँसेपाटी प्रकरणमा ६ जनालाई मुद्दा चलाउन सीआईबीको सिफारिस

५ मंसिर, काठमाडौं । भैँसेपाटी प्रहरी प्रभागकी इन्स्पेक्टर बिनुकमारी शाहीसहित ६ जनाविरुद्ध मुद्दा चलाउन सिआइबीले सिफारिस गरेको छ । प्रहरीकै मिलेमतोमा व्यापारीलाई पक्राउ गरी बलात्कार मुद्दामा फसाउने भन्दै पैसा असुलिएको घटनामा प्रहरीको केन्द्रीय अनुसन्धान ब्यूरो (सीआइबी)ले अनुसन्धान पूरा गरी रायसहितको प्रतिवेदन जिल्ला सरकारी वकिल कार्यालय, ललितपुरमा बुझाएको हो । 

फरार रहेकी इन्स्पेक्टर बिनुकमारी शाहीसहित ६ जनाविरुद्ध मुद्दा चलाउन सीआइबीले  प्रतिवेदन मंगलबार सरकारी वकिल कार्यालयमा बुझाएको हो । पक्राउ परेका चार र दुई फरारको घटनामा संलग्नता देखिएको भन्दै उनीहरूमाथि संगठित अपराध र आपराधिक लाभ मुद्दा चल्न लागेको हो । 

प्रहरीले सो घटनामा संलग्न इटहरीका ताज इस्लाम, सुष्मा विक र भीमादेवी थापा तथा प्रहरी प्रभाग भैँसेपाटीका सहायक हवल्दार महेन्द्र हमाललाई पक्राउ गरेको छ । इन्स्पेक्टर शाहीसहित इटहरीका दर्शन पोखरेललाई फरार प्रतिवादी बनाउन प्रहरीले सिफारिस गरेको छ । 

गिरोहसँग शंकास्पद सम्बन्ध देखिएका एसपी कमल थापाको बयान लिए पनि प्रमाण नपुगेको भन्दै उनीविरुद्ध भने मुद्दा नचलाउन सिआइबीको सिफारिस छ ।  गत ७ असोजमा प्रहरी प्रभाग भैँसेपाटीमा इटहरीका एक व्यवसायीलाई थुनामा राखी बलात्कार मुद्दामा फसाइदिने भन्दै ३० लाख रुपैयाँ लेनदेन गरी छाडिएको थियो । इटहरीकै सुष्मा विकसँग ती व्यापारी केही महिनाअघि इलाम घुम्न गएका थिए । तिनै युवतीलाई कुटपिटको उजुरी हाल्न लगाई बलात्कार मुद्दा चलाउने भन्दै प्रहरी कार्यालयमै बार्गेनिङ भएको थियो ।