चेक बाउन्स मुद्दामा पक्राउ परेका काभ्रेका सत्यमान लामालाई पनि डिल्लीबजार कारागार पठाइयो

५ मंसिर, काठमाडौं । आइतबार साँझ पक्राउ परेका गुण्डा नाइके सत्यमान लामालाई पनि डिल्लीबजार कारागार चलान गरिएको छ । उनी चेक बाउन्स मुद्दामा पक्राउ परेको थिए । सुन तस्करी प्रकरणमा सम्लग्न दावासँग पनि उनको सम्बन्ध रहेको पाइएको छ ।  

फैसला कार्यान्वयनका लागि अदालत उपस्थित गराइएका उनलाई कारागार चलान गरिएको हो । अदालतको निर्देशनपछि लामालाई डिल्लीबजार कारागार चलान गरिएको परिसर काठमाडौंले जनाएको छ ।

काभ्रेको तेमाल घर भई काठमाडौं महानगरपालिका–४ बस्दै आएका लामालाई काठमाडौं जिल्ला अदालतले २०८० चैत २७ गते २ वर्ष कैद र ३० लाख बिगो र ३० लाख जरिवाना सजाय हुने फैसला गरेको थियो ।

पक्राउ परेका सत्यमान दावा लामाका सहयोगी पनि हुन् । उनी बुद्धचित्त र रक्तचन्दन व्यापारमा पनि मुछिएका थिए । २०७५ सालमा किसानको बुद्धचित्त माला लुटपाट गरेको आरोपमा पनि उनी पक्राउ परेका थिए । त्यसबेला तत्कालीन सांसद नवीना लामा उनलाई छुटाउन गएपछि विवादसमेत भएको थियो ।