एमाले नेता ऐन महरले आफूलाई हनी ट्रयापमा पारेको भन्दै जाहेरी दिएकी युवती अदालतबाटै पक्राउ

५ मंसिर, काठमाडौं । एमालेका युवा नेता ऐन महरको जाहेरीमा बझाङ घर भएकी युवती रश्मिला धामी पक्राउ परेकी छन् । उनलाई उच्च अदालत पाटनबाट बुधबार प्रहरीले पक्राउ गरेको हो । उनले प्रहरीलाई देख्नासाथ अदालत परिसरमै विष सेवन गरेकी थिइन् । यसपछि प्रहरीले नियन्त्रणमा लिएको हो । 

प्रहरीका अनुसार बुधबार पाटनस्थित उच्च अदालत परिसरबाट उपत्यका अपराध अनुसन्धान कार्यालय टेकुको टोलीसँग उनकको भेट भएको थियो । प्रहरीलाई देखेपछि उनले आत्तिएर विषादीजन्य वस्तु सेवन गरेको र पक्राउ गरी उनलाई उपचारका लागि पुल्चोकस्थित अल्का अस्पताल लगिएको छ । 

उनीमाथि आपराधिक लाभ लिन खोजेको कसूरको आरोप छ । महरले आफूमाथि ‘हनी ट्रयाप’ मा पारेको भन्दै काठमाडौं प्रहरीमा दिएको जाहेरीका आधारमा काठमाडौं जिल्ला अदालतबाट वैशाख ३१ गते पक्राउ पुर्जी जारी भएको थियो । उनलाई प्रहरीले खोजिरहेको थियो ।