दुर्गा प्रसाईंलाई ५ दिन थुनामा राखेर अनुसन्धान गर्न अनुमति, अन्य ९ जनामाथि अभद्र व्यवहारको कसुर

५ मंसिर, काठमाडौं । साइबर अपराधसम्बन्धी कसुरमा पक्राउ परेका मेडिकल व्यवसायी दुर्गा प्रसाईंलाई जिल्ला अदालत काठमाडौंले ५ दिन म्याद थप गरेको छ । प्रधानमन्त्री केपी शर्मा ओलीविरुद्ध अफवाह फैलाएको आरोपमा पक्राउ परेका प्रसाईंलाई म्याद थपका लागि बुधबार अदालत लगिएको थियो । 

न्यायाधीश माधवप्रसाद अधिकारीको इजलासले प्रसाईंलाई पाँच दिन थुनामा राखेर अनुसन्धान गर्न अनुमति दिएको हो । सीआईबीले प्रसाईंलाई मंगलबार बिहान भक्तपुरस्थित उनकै घरबाट पक्राउ गरेको थियो । सीआईबीले थप अनुसन्धान र कानुनी प्रक्रियाका लागि प्रसाईंलाई अपराह्न आफू मातहतको साइबर ब्यूरोमा पठाएको थियो ।

प्रहरीले विद्युतीय अपराध नियन्त्रण ऐन, २०६३ विपरीतको कसुर गरेको भन्दै उनलाई पक्राउ गरेको थियो । महान्यायाधीवक्ताको कार्यालयले भने विद्युतीय अपराध नियन्त्रण ऐनसँगै मुलुकी फौजदारी संहितामा उल्लेखित बेइज्जती गर्न नहुने कसुर, झुठा प्रमाण बनाउन नहुने, राष्ट्रपति वा सांसद्लाई धम्की दिन नहुने लगायतका कसुरमा पनि अनुसन्धान हुनसक्ने राय दिएको छ ।

प्रसाईंले सोमबार प्रधानमन्त्री केपी शर्मा ओलीको कम्बोडियामा रहेको एक्जिएटा कम्पनीमा लगानी रहेको अभिव्यक्ति दिएका थिए । त्यसबेला उनले केही कागजातहरु देखाउँदै प्रधानमन्त्री ओलीले कम्बोडियामा २१ करोड अमेरिकी डलर बराबर लगानी गरेको दाबी गरेका थिए ।

यसैबीच प्रसाईंको भक्तपुरस्थित घरबाट पक्राउ परेका ९ जनामाथि अभद्र व्यवहारको कसुरमा प्रहरीले अनुसन्धान गर्ने भएको छ । मंगलबार बिहान नेपाल प्रहरीको केन्द्रीय अनुसन्धान ब्युरो (सिआइबी) को टोलीले प्रसाईंलाई घरबाट उनीहरुलाई नियन्त्रणमा लिएको थियो । पक्राउ गर्न पुग्दा अवरोध पुर्याएको भन्दै २५ जनालाई प्रहरीले नियन्त्रणमा लिएको थियो । त्यसमध्ये १५ जनालाई प्रहरीले छाडेर १० जनामाथि सोधपुछ गरेको थियो ।

अब एक जनालाई पनि जिम्मा लगाएर ९ जनामाथि अभद्र व्यवहारको कसुरमा अनुसन्धान गर्न लागेको प्रहरीले जनाएको छ । सरकारी वकिलमार्फत उनीहरूलाई जिल्ला प्रशासन कार्यालय भक्तपुरमा पेश गर्ने तयारी गरिएको छ । प्रसाईंले मंसिर ७ गते काठमाडौंमा आन्दोलन गर्ने तयारी गरेका थिए । कम्बोडियाको टेलिकममा प्रधानमन्त्री केपी शर्मा ओलीले साढे ३२ अर्ब लगानी गरेको भन्दै भिडिओ कलमार्फत् कसैले देखाएको अपुष्ट ’प्रमाण’ प्रसाईंले सार्वजनिक गरेका थिए ।